У Смаргоні прайшла ўрачыстасць з нагоды 100-годдзя сацыяльнай службы Беларусі
У зале сабраліся цяперашнія сацыяльныя работнікі, ветэраны і былыя кіраўнікі ўпраўлення па працы, занятасці і сацыяльнай абароне райвыканкама.
З прывітальным словам да ўдзельнікаў урачыстага сходу звярнуўся намеснік старшыні райвыканкама Генадзь Бычко. Ён адзначыў, што сацыяльная служба дае людзям надзею, а іншым разам, і ўпэўненасць у заўтрашнім дні, суправаджае чалавека ад нараджэння да апошняга дня яго жыцця. Вядома ж, ёсць пэўныя цяжкасці. Таму Генадзь Паўлавіч пажадаў усім, хто працуе і працаваў у сацыяльнай сферы, хто знаходзіцца пад апекай сацыяльных работнікаў, надзеі і ўпэўненасці, імкнення да лепшага.
Потым на сцэну запрасілі былых кіраўнікоў сацыяльнай службы раёна – Ядвігу Кумпіцкую, Тэрэзу Сушынскую, Зыгмунда Друцеля, Святлану Гаспадарову. Начальнік па працы, занятасці і сацыяльнай абароне райвыканкама Зоя Крачкоўская і дырэктар УТЦСАН “Цёплы дом” Марына Нікалайчык падзякавалі ім за плённую добрасумленную працу і ўручылі падзячныя пісьмы, падарункі і кветкі.
Начальнік упраўлення па працы, занятасці і сацыяльнай абароне райвыканкама Зоя КРАЧКОЎСКАЯ выказвае цёплыя словы ўдзячнасці былому кіраўніку гэтай службы Зыгмунду ДРУЦЕЛЮ.
Дырэктар УТЦСАН “Цёплы дом” Марына НІКАЛАЙЧЫК уручае падзяку ветэрану сацыяльнай службы Марыне ГЕРМАН.
Увага была нададзена ветэранам, якія адпрацавалі ў сістэме сацыяльнай абароны 25 і больш гадоў. За шматгадовую добрасумленную працу, прафесіяналізм і адданасць сваёй справе ім таксама ўручылі падзякі Зоя Крачкоўская і Марына Нікалайчык.
Узнагарод і падарункаў было многа ў гэты дзень. Ад райвыканкама, ветэранскай арганізацыі, з якою цесна супрацоўнічае сацыяльная служба, раённага аддзялення грамадскага аб’яднання “Беларуская асацыяцыя маладых хрысціянскіх жанчын”.
Напрыканцы ўрачыстасці на сцэну запрасілі жанчын, якія выгадавалі 5 і больш дзяцей і ў мінулым годзе былі ўзнагароджаны ордэнам Маці. Ганаровая місія ўручыць важкую дзяржаўную ўзнагароду хатняй гаспадыні са Смаргоні Ніне Адосій і работніцы СШ №2 Алене Бароўскай была прадастаўлена намесніку старшыні райвыканкама Генадзю Бычко.
Юрый ЯНУШКЕВІЧ.
Фота аўтара.