У Магілёўскай вобласці, у тым ліку ў Кіраўскім раёне, працягваецца месячнік па добраўпарадкаванні. Створана і дзейнічае рабочая група па кантролі за навядзеннем парадку і добраўпарадкавання тэрыторый раёна на чале са старшынёй райсавета дэпутатаў Галінай Слабоднікавай.
Работы праводзяцца ў адпаведнасці з зацверджаным планам-графікам мерапрыемстваў месячніка ў горадзе і раёне. У кожным сельскім Савеце дэпутатаў складзены і рэалізуецца свой план-графік работ.
Члены рабочай групы праводзяць маніторынгі стану тэрыторый, пры неабходнасці прымаюць меры ўздзеяння.
Сярод мерапрыемстваў — ліквідацыя сухастойных і ветравальных дрэў уздоўж дарог і на могілках, уборка несанкцыянаваных звалак і смецця, уцягненне ў севазварот пустуючых земляў, рэкультывацыя невыкарыстоўваемых участкаў, устаноўка і афарбоўка агароджы і г.д. Гэта далёка не ўвесь пералік намечанага на перыяд правядзення месячніка.
Па стане на 2 верасня ў ходзе суботнікаў, праводзімых у межах месячніка, удзел у правядзенні работ па добраўпарадкаванні прыняло больш за 560 чалавек з 37 арганізацый, устаноў і прадпрыемстваў горада і раёна. Агульная плошча тэрыторый, дзе быў наведзены парадак, склала 131,6 га. Праведзены работы па ліквідацыі ўсохлых дрэў, вырубцы пустазелля і хмызняку. Прыведзена ў парадак, пафарбавана і адрамантавана 14 гандлёвых аб’ектаў, 43 прыпыначных пункты грамадскага транспарту, добраўпарадкавана 168 м2 дарог агульнага карыстання.
Работы працягваюцца…
Аб работах у межах месячніка па добраўпарадкаванні на тэрыторыі Скрыпліцкага сельскага Савета дэпутатаў расказала яго старшыня Жанна РЫШКЕВІЧ:
— Тэма навядзення парадку на зямлі, добраўпарадкавання тэрыторый не губляе сваёй актуальнасці на працягу ўсяго года. Вось і падчас правядзення чарговага месячніка сіламі калектываў арганізацый і прадпрыемстваў горада значны аб’ём работ быў праведзены на грамадскіх могілках. Так, на могілках (№2) у в.Хвайніца правялі абшошванне пустазелля, уборку смецця, уладкаванне пляцоўкі для часовага збора і захоўвання смецця калектывы КУП “Кіраўскія бытпаслугі” і Фонда сацыяльнай абароны насельніцтва, у в.Самадумаўка такі ж аб’ём работ выканалі прадстаўнікі аддзела ідэалагічнай работы, культуры і па справах моладзі райвыканкама і філіяла “Кіраўскі райпаліўзбыт”. Наведзены парадак на могілках у в.Віктараўка і Вязаўка.
Са станоўчага боку хацелася б адзначыць работу па добраўпарадкаванні, якую праводзіць калектыў упраўлення па працы, занятасці і сацыяльнай абароне райвыканкама: на працягу ўсяго года яны падтрымліваюць узорны парадак на замацаваных за імі грамадскіх могілках.
Старанна папрацавалі падчас прайшоўшага суботніка работнікі ясляў-садка аг.Скрыпліца: прыгожы выгляд набыла пафарбаваная агароджа вакол могілак у в.Капусціна.
Не засталіся ў баку ад карыснай справы навядзення парадку на зямлі работнікі КСУП “Барчыцы-агра”, Барчыцкага СДК і мясцовага магазіна. Плённа папрацаваўшы, яны навялі чысціню на прылягаючых да сваіх будынкаў тэрыторыях. У Барчыцах вядуцца работы па ўцягненні ў севазварот рэкультываваных раней участкаў.
На тэрыторыі сельсавета будуць працягнуты работы па рэкультывацыі земляў, уцягненні іх у севазварот. У бліжэйшы час запланавана ліквідацыя падмурка будынка былой бібліятэкі ў в.Хвайніца. У гэтым жа населеным пункце па вул.Паркавай плануем заняцца выкарчоўкай былых яблыневых садоў на пустуючых участках, а землі ўцягваць у севазварот. У в.Капусціна будуць спілаваны 4 аварыйныя дрэвы. Падчас чарговага суботніка, які запланаваны на суботу, 8 верасня сіламі школьнікаў Барчыцкага НПК і членаў райкама ГА “БРСМ” запланавана правядзенне работ па добраўпарадкаванні парка і вадаёма ў в.Хвайніца па вул.Паркавай.
Значную дапамогу ў інфармаванні грамадзян, правядзенні растлумачальнай работы па пытаннях навядзення парадку на зямлі аказваюць прадстаўнікі органаў тэрытарыяльнага грамадскага самакіравання. Асабліва хацелася б адзначыць работу старасты аг.Барчыцы Веры Стаўровай і Кацярыны Будніцкай з в.Хвайніца .
Важна, каб за работу ўзяліся ўсе разам, дружна. Для кожнага чалавека знойдзецца справа па сілах і магчымасцях. Мы жывем на гэтай зямлі, наш абавязак яе прыбіраць і ўпрыгожваць. Бо ўсё, што мы зробім, зробім для сябе, для свайго камфорта.
Падрыхтавала Людміла СЯМЁНАВА.