У Віцебску зачынілася крама рэчаў у нацыянальным стылі. Амаль не было пакупнікоў

У Віцебску зачынілася крама рэчаў і сувеніраў у нацыянальным стылі «Князь Вітаўт». Гандлёвая кропка праіснавала менш за год: адчынілася яна летась ў жніўні. Заснавальнікі тлумачаць, што праца ў Віцебску ішла цяжка, бо было мала пакупнікоў, ды і тыя незаможныя, паведамляе «Радыё Свабода».

Адміністрацыя крамы шукала выйсце са складанага становішча. Найперш знайшлі месца з таннейшай арэндай: «Князь Вітаўт» з асобнага памяшкання на праспекце Фрунзэ пераехаў у гандлёвы комплекс «Марка-сіці» на вуліцы Леніна. Крама знаходзілася тут на самым ніжнім паверсе, дзе быў прымальны кошт арэнды, але куды даходзіў далёка не кожны наведнік.

Пакупнікоў спрабавалі прывабіць з дапамогай рэкламы: запрашалі выступіць музыкаў, ладзілі выязны гандаль, аўтограф-сесіі і мастацкія акцыі. Але гэта не дапамагло: прыбыткаў не пабольшала, і краму давялося закрыць.

Зараз рэчы і сувеніры ў нацыянальным стылі можна набыць у інтэрнэт-краме. Для жыхароў Віцебска тут прадугледжана адмысловая зніжка: бясплатная дастаўка тавараў на суму ад 30 рублёў. Для параўнання: для жыхароў Брэста — толькі ад 50.