«З пачуццём гонару за сваю краіну!» Трэцяга ліпеня на Бярозаўшчыне адбыліся ўрачыстасці да Дня Незалежнасці Рэспублікі Беларусь (+15 ФОТА)

г. Бяроза

Па традыцыі ўрачысты мітынг 3 ліпеня прайшоў у Камсамольскім скверы, дзе сабраліся прадстаўнікі працоўных калектываў і грамадскіх арганізацый, кіраўніцтва раёна, ветэраны працы і Вялікай Айчыннай вайны, маладое пакаленне.

Адзначаючы гэты дзень, мы славім нашых герояў-землякоў, якім давялося перажыць непамерныя цяжкасці вайны дзеля вызвалення роднага краю. Дзякуючы самаахвярнасці, мужнасці і патрыятызму абаронцаў Беларусі, нашы людзі атрымалі права жыць пад мірным небам.

У сваім выступленні старшыня Бярозаўскага райвыканкама Леанід Мартынюк адзначыў, што Дзень Незалежнасці – гэта сімвал нашага грамадства, міру і стабільнасці, мужнасці і гераізму, пераемнасці пакаленняў і павагі да традыцый, якія дазваляюць зберагчы і прымножыць усё тое добрае і каштоўнае, што назапашана старэйшымі пакаленнямі дзеля будучыні. Таксама на мітынгу выступілі начальнік Бярозаўскага гарнізона Юлій Гвоздзь, старшыняраённага аб’яднання прафсаюзаў Вераніка Разько.

Хвіліна маўчання, метраном, воінскі салют, вянкі і кветкі, гірлянда славы да помніка загінуўшым і Вечнага агню, урачысты марш вайскоўцаў...

 

Прадоўжылася свята канцэртнай праграмай “Святая Радзіма, мая Беларусь”, масавымі гуляннямі і спартыўна-забаўляльнай праграмай на стадыёне “Паўночны”, дзе было асабліва шматлюдна. А скончылася ўсё рэспубліканскай акцыяй “Праспяваем гімн разам”.

Мы – беларусы! Ганарова і мажорна гучаць гэтыя словы. Важна памятаць пра гэта, адчуваць сваю годнасць і імкнуцца зрабіць жыццё вартым спрадвечных народных мар.

Генадзь КУРЫЛОВІЧ.

г. Белаазёрск

“Няхай імя тваё свеціцца, Беларусь!” – пад такой назвай на цэнтральнай плошчы горада энергетыкаў адбыўся мітынг, прысвечаны Дню Незалежнасці Рэспублікі Беларусь.  Пачэснае права падняць сцяг было прадастаўлена брыгадзіру УВП “Вердымар” Уладзіміру Алесеюку, кандыдату ў майстры спорта Таццяне Труцько і воіну-інтэрнацыяналісту Леаніду Гладкоўскаму. 

З галоўным святам краіны сардэчна павіншаваў жыхароў і гасцей горада старшыня Белаазёрскага гарвыканкама А.П. Данілюк. Важнасць гэтага дня для беларускага народа падкрэслілі дырэктар УВП “Вердымар” С.І. Мелех і старшыня гарадской арганізацыі ГА “Беларускі саюз ветэранаў вайны ў Афганістане” В.М. Прыбытка. А старшыня савета моладзі каледжа электратэхнікі Г.А. Мурына запэўніла, што маладое пакаленне ганарыцца сваёй дзяржавай і будзе рабіць усё магчымае для яе росквіту. У выкананні ансамбля “Натхненне” прагучала песня “Беларусь”, а затым жыхары горада дружна выканалі гімн нашай краіны ў рамках рэспубліканскай акцыі “Праспяваем гімн разам”. У гарадскім скверы да мемарыяльных пліт былі ўскладзенывянкі і кветкі ў памяць аб героях Вялікай Айчыннай вайны.

На пляцоўцы каля Дома культуры адбылася канцэртная праграма “Заўжды ганарыцца сваёю зямлёю!”. Парадавалі гараджан сваёй творчасцю ўзорны ансамбль танца “Журавінка”, народны клуб ветэранаў вайны і працы “Подзвіг”, народныя ансамблі народнай песні “Пескаўскія весялухі” і інструментаў “Пазітыў”, салісты ДК і ЦДАДіМ. У захапленні былі белаазёрцы ад выступлення артыстаў ДУВП “Бярозаўская ЖКГ”.  Памерацца сіламі можна было падчас спартыўных спаборніцтваў, працавалі гандлёвыя рады, многа было атракцыёнаў для дзяцей. А закончыла святочны дзень дыскатэка. 

Ускладанне вянкоў да брацкай магілы савецкіх воінаў і партызанаў (г. Белаазёрск).

Валянціна КІВАТЫЦКАЯ, г. Белаазёрск.

Фота Сцяпана ЦЮШКЕВІЧА і Таццяны АМБРАЖУК.