У Верхнядзвінскім раёне незаконна высеклі больш за 200 дрэў у лесе

215 дрэў розных парод, не прызначаных для высечкі, спілавалі работнікі Верхнядзвінскага лясгаса. Распрацоўваючы лесасеку на тэрыторыі Стралкоўскага лясніцтва, секары добра выйшлі за яе межы. У выніку незаконна зрэзалі 39 кубаметраў лесу.

Верхнядзвінская міжрайінспекцыя аховы жывёльнага і расліннага свету распачала адміністрацыйны працэс. Лясгасу трэба заплаціць штраф у памеры 1380 рублёў, пакрыць нанесеную шкоду — 2,5 тысячы рублёў, а таксама кошт незаконна нарыхтаванай драўніны на суму больш за 600 рублёў.

Падобнае парушэнне выявілі і работнікі Мазырскай міжрайінспекцыі ў Рэмезаўскім лясніцтве Ельскага лясгаса. Пры правядзенні высечкі леснікі таксама зайшлі на суседнюю тэрыторыю і незаконна спілавалі 49 дрэў агульным аб’ёмам 20 кубаметраў. Да адміністрацыйнай адказнасці прыцягнуты ляснічы, які сачыў за арганізацыяй работы на ўчастку. Яму давядзецца выплаціць каля 500 рублёў.