Колькі вады вы п’яце на дзень?

Яўген Вострабародаў, слесар-інструментальшчык:

− Ведаю, што выпіваць трэба паўтара літра вады ў дзень. Я і прытрымліваюся гэтага, але ваду замяняю сокамі, ці гарбатай. Цяпер зіма, таму піць хочацца меней, чым летам.

 Лілія Рагуль, настаўніца:

− Вады п’ю не вельмі многа, бо не люблю яе. Ведаю, што трэба выпіваць два ці болей літраў у дзень. Па раніцах прымушаю сябе выпіць шкляначку, але мне нясмачна. Так што добра, калі літр у дзень выпіваю.

Таццяна Скарынка, працоўная:

− Вады п’ю мала, аддаю перавагу гарбаце ці каве.Але ваду люблю з-пад крана, у бутэльках нясмачная.

Святлана Арцёмава, інжэнер-тэхнолаг:

− Я не сачу за тым, колькі п’ю вады ў дзень. Хочацца піць − п’ю.

Раіса Казунко, лабарант:

− Акрамя вады, я п’ю і наша маладзечанскае малако. Вельмі смачнае. І вада, тая, што з-пад крана, у нас у Маладзечне  добрая, смачная, чыстая.

Людміла Сівакова, гардэробшчык:

− Я ваду не вельмі піць люблю, але лепей ужо вада, чым сокі магазінныя, ці кава.

Ігар Партон, інжэнер-механік:

− Я ведаю, што трэба выпіваць паўтара літры вады на дзень.  Летам імкнуся гэтага прытрымлівацца, а зімой надта холадна і так, не хочацца халодную ваду яшчэ піць. А яшчэ я заўважыў, што фільтраваная вада не адрознівацца ад той, што з-пад крана: усё роўна ад яе застаецца накіп на чайніку.

Падрыхтавалі Наталля ТУР, Настасся РОЎДА.