Міліцыя разагнала кінапаказ пра Слуцкае паўстанне

Калектыўны прагляд дакументальнай стужкі пра Слуцкае паўстанне мясцовая міліцыя палічыла несанкцыянаваным масавым мерапрыемствам, разагнала яго ўдзельнікаў, а на арганізатарў склала пратаколы аб адміністрацыйным правапарушэнні.

23 лістапада 17 жыхароў Слуцка сабраліся для прагляду фільма “40 дней сялянскай рэспублікі”, які зняты дзяржаўным каналам “ГНТ” і прысвечаны адметнай падзеі ў гісторый краіны — Слуцкаму паўстанню. Кінапрагляд быў арганізаваны ў маленькай зале Казловіцкага дома культуры. Але праз дзесяць хвілін пасля пачатку мерапрыемства ў залу ўварваліся супрацоўнікі аддзела аховы правапарадку і прафілактыкі праванарушэнняў Слуцкага РАУС, якіх узначальваў начальнік аддзела Дзмітрый Шклярэўскі.

Пра тое, што адбывалася далей, расказвае грамадская актывістка, былая настаўніца гісторыі Зінаіда Цімошак:

“У нашым горадзе ў канцы лістапада кожны год адбываюцца мітынгі ў гонар гадавіны Слуцкага паўстання. Многія мае знаёмыя ўжо пажылыя людзі, якія вучыліся яшчэ па савецкіх падручніках. Мне ўжо надакучыла ім тлумачыць, чаму наш горад такі прывабны для штогадовых вандровак людзей з нашых гарадоў. Тут як раз патэлефаванала Ніна Стужынская, кандыдат гістарычных навук, аўтар кнігі пра Слуцкае паўстанне, якая кансультавала пастаноўшчыкаў фільма. Папытала, ці ёсць цікавасць у людзей да фільма. Цікавасць у людзей была.

Дамовіліся наконт памяшкання ў Казловіцкім доме культуры, паколькі там ёсць экран і лепшыя магчымасці для прагляду. Ніякіх папярэдніх заявак не падавалі ў райвыканкам, паколькі не ведалі, ці збяруцца людзі, ці знойдзем транспарт (Казловічы знаходзяцца прыкладна ў 8 кіламетрах ад Слуцка). Да таго ж, мы не збіраліся мітынгаваць, ці абмяркоўваць праблемы і не лічылі, што міліцыя аб’явіць гэта незаконнай сходкай.

Аўдыторыя сабралася, у асноўным, пажылая. Многім даўно пераваліла за 70 гадоў, яны рады былі сабрацца і паглядзець фільм пра гістарычныя падзеі горада.

А Шклярэўскі і міліцыянты ўстроілі такі вэрхал, што людзі да гэтага часу не могуць апомніцца. Не паспела Ніна Стужынская сказаць колькі ўступных слоў да фільма, як ў дзверы пагрукалі і на парозе стаяў начальнік аддзела Шклярэўскі. Людзі прасілі яго прысесці, паглядзець, чым яны займаюцца, паслухаць цікавага чалавека, але ён быў няўмольны.

Спачатку на допыт вызвалі мяне, пасля міліцыянты раздзяліліся на “тройкі” і вялі “апытванні” людзей адразу ў 4-5 памяшканнях.

Цягнулася гэтая дрэнная справа больш за дзве гадзіны. Пасля ўдзельнікаў прагляду фільма адпусцілі, а мяне завезлі ў Слуцкі РАУС, паколькі я адказалася падпісваць адміністратыўны пратакол, напісаны маленькімі літарамі неразборлівым почыркам Шклярэўскага. Адначасова запатрабавала весці са мной размову на белмове і скласці на гэтай жа мове пратакол. Міліцыянт Шклярэўскі паспрабаваў размаўляць на мове, а пасля стаў шукаць перакладчыка. Спачатку хацеў назначыць мне перакладчыкам дырэктара Казловіцкага дома культуры Аляксандра Туміловіча, але я адказалася ад яго паслуг. Туміловіч цудоўна валодае беларускай мовай, пастаноўшчык выдатных спектакляў. Але пад час гэтай “аблавы” выглядзеў знясіленым. Было зразумела, што яго чакаюць наперадзе вялікія непрыемнасці.

У адносінах да мяне ў РАУС складзены адміністратыўны пратакол аб парушэнні артыкула 23.34.Кодэкса аб адміністратыўных правапарушэнях — парушэнне парадку арганізацыі правядзення сходаў. Папярэджана аб тым, што справа будзе перададзена ў суд”.