Антон Сурапін: «Зараз праблем з вучобай у мяне няма»

Былы зняволены “амерыканкі” прызнаўся, што спадзяецца вярнуцца да нармальнага студэнцкага жыцця.

Малады чалавек быў затрыманы 13 ліпеня, пасля таго, як на сваім сайце Belarusian News Photos размясціў фотаздымак шведскіх мядзведзей-дысантнікаў, якіх выкінулі над Беларуссю прадстаўнікі шведскага рэкламнага агенцтва. 23 ліпеня Сурапіну было прад’яўленае абвінавачванне па частцы 3 артыкула 371 Крымінальнага кодэкса Рэспублікі Беларусь «Незаконнае перасячэнне дзяржаўнай мяжы Рэспублікі Беларусь». Юнака вызвалілі 17 жніўня пад падпіску аб неразгалошванні і нявыездзе.

Зараз увесь вольны час Антон Сурапін аддае на размовы з калегамі-журналістамі. У планах -- праца над уласным праектам і вяртанне на журфак, бо зусім хутка пачынаецца новы навучальны год, а вучыцца Антон на дзённым.

-- Планую вярнуцца ў верасні ў Мінск і актыўна пачаць працаваць, -- падзяліўся юнак з “Народнай Воляй”. --  Абавязкова сустрэнуся з маімі мінскімі сябрамі, аднакурснікамі. Хаця зараз на першым месцы праца.

-- Не баіцеся праблем з універсітэтам?

-- Думаю, што мяне не адлічаць, бо фармальных нагод для гэтага няма. Сесія за трэці курс у мяне здана, у “амерыканку” патрапіў на канікулах, ні воднай пары я не прапусціў. Зараз праблем з вучобай у мяне няма.