Кіраўнік ІІХФ выступіў супраць пераносу ЧМ-2014 з Беларусі

18 мая ў Хельсінкі адкрыўся традыцыйны штогадовы кангрэс Міжнароднай федэрацыі хакея (ІІХФ), на якім кіраўнік федэрацыі Рэнэ Фазель выступіў супраць пераносу чэмпіянату свету па хакеі-2014 з Беларусі ў іншую краіну, паведамляецца на сайце ІІХФ.

"Ад адмены чэмпіянату ў Беларусі пацерпяць невінаватыя людзі: балельшчыкі і спартсмены. Я ўражаны меркаваннем дзвюх буйнейшых шведскіх газет, якія выйшлі з падобнымі загалоўкамі: "Спорт не павінен быць інструментам палітыкі", — адзначыў кіраўнік ІІХФ.

На яго думку, спорт не можа і не павінен быць палітычным інструментам. Ён павінен весці да прымірэння і адкрыцця новых межаў, а рознагалоссі пакінуць палітыкам. "Забароны і байкоты спартыўных спаборніцтваў абясцэньваюць ідэю спорту. Такое наша меркаванне", — адзначыў прэзідэнт ІІХФ.