Нацбанк Беларусі прагназуе ў 2012 годзе сярэднегадавы курс долара на ўзроўні Br9150
Аб гэтым паведаміла ўчора журналістам старшыня праўлення Нацбанка Надзея Ермакова, перадае БЕЛТА.
Надзея Ермакова адзначыла, што прагназаваць, якім будзе курс беларускага рубля ў 2012 годзе сёння складана. "Але ў разлік прымаецца сярэднегадавы курс на ўзроўні Br9150 за $1, — сказала яна. — Хоць, зыходзячы з таго, як пабудаваны прагноз развіцця эканомікі, мы думаем, што курс долара будзе меншы, а рубель — мацнейшы". Курс долара Br9150 — гэта самы горшы, песімістычны варыянт, падкрэсліла кіраўнік Нацбанка. Яна адзначыла, што ў гэтым годзе сярэднегадавы курс долара павінен скласці Br8600. "Br8600 — гэта тое, што склалася ў нас цяпер па долару", — адзначыла Надзея Ермакова. На яе думку, снежань не прынясе значных змяненняў у гэтым плане.
Купюра Br200 тыс. з'явіцца ў 2012 годзе
Купюру Br200 тыс. плануецца выпусціць у Беларусі ў І квартале 2012 года, паведаміла старшыня праўлення Нацбанка.
"Купюра пакуль у рабоце. Гэта вялікі тэхнічны працэс. З новага года купюра яшчэ не з'явіцца ў абароце, лічу, што гэта адбудзецца ў першым квартале 2012 года", — сказала Надзея Ермакова. Разам з тым яна не адказала, што будзе адлюстравана на новай купюры. "Няхай гэта будзе навагоднім сюрпрызам для беларусаў", — сказала яна. Раней Нацбанк паведамляў, што на купюры Br200 тыс. будуць адлюстраваны беларускія творы дойлідства. Акрамя ўводу ў абарачэнне новай купюры Нацбанк Беларусі мае намер вывесці з абарачэння разліковыя білеты наміналам Br10 і Br20, паколькі на іх абслугоўванне трацяцца значныя сродкі.
Рэкапіталізацыя дзяржбанкаў — да канца года
Рэкапіталізацыя дзяржаўных банкаў Беларусі можа быць праведзена да канца 2011 года, паведаміла Надзея Ермакова. "Спадзяюся, гэта будзе зроблена да канца гэтага года", — сказала Надзея Ермакова. Аб'ём неабходных для гэтай працэдуры сродкаў яшчэ разлічваецца. "Нацбанк прапанаваў свае разлікі, але, хутчэй за ўсё, рэкапіталізацыя будзе праведзена на большую суму, зыходзячы з таго, што гэта будуць не непасрэдныя ўліванні грошай у банкаўскую сістэму, а праз каштоўныя паперы Міністэрства фінансаў", — адзначыла старшыня праўлення Нацбанка.
Яна не ўдакладніла, якую менавіта суму прапанаваў накіраваць на рэкапіталізацыю Нацбанк, і прапанавала пачакаць да таго часу, калі будзе прынята канчатковае рашэнне. "Сёння-заўтра мы яшчэ з Міністэрствам фінансаў і знешнім аўдытам будзем праводзіць разлікі, каб ацэнка нарматыўнага капіталу нашых дзяржаўных банкаў адпавядала міжнародным стандартам і тым аб'ёмам крэдытаў, якія могуць выдаць банкі і якія яны могуць прыцягнуць ад знешніх фінансавых інстытутаў", — дадала Надзея Ермакова.