У мінскім метро загінула 16-гадовая дзяўчына

Учора раніцай у сталічным метро загінула навучэнка каледжа.

Як паведамілі ў прэс-службе ГУУС Мінгарвыканкама, здарэнне адбылося ў 7.52 на станцыі "Пушкінская". Паводле інфармацыі прэс-службы, дзяўчына па неасцярожнасці ўпала на рэйкі, а затым спрабавала самастойна выбрацца на край платформы і была смяротна траўміравана цягніком, які прыбываў на станцыю. Паводле версіі аднаго з супрацоўнікаў метрапалітэна, які прагледзеў запісы камер відэаназірання, дзяўчына села ў цягнік на станцыі "Кунцаўшчына", выйшла на "Пушкінскай" і накіравалася да цягнікоў супрацьлеглага кірунку. Яна ўпэўнена ішла па платформе, гэтак жа ўпэўнена спусцілася на рэйкі. У ГУУС Мінгарвыканкама гэтую версію не пацвярджаюць: дзяўчына альбо размаўляла па мабільным тэлефоне або ішла ў вялікім задуменні, не ўтрымалася на платформе і ўпала, паведамілі нам у прэс-службе. Асоба загінулай устаноўлена: ёй з'яўляецца 16-гадовая навучэнка аднаго са сталічных каледжаў. З 7.52 па 8.31 быў абмежаваны рух цягнікоў са станцыі "Фрунзенская" да станцыі "Каменная горка".

Алена АЎЧЫННІКАВА.