У памяць аб памерлых на дарогах

У Гродне ўпершыню прайшоў Дзень памяці дзяцей, якія загінулі на дарогах вобласці. За апошнія пяць гадоў такая доля спасцігла 52 дзяцей, у тым ліку сёлета — дваіх дзяцей, жыццё аднаго з якіх абарвалася на 25-м дні жыцця.

У Гродне мерапрыемства, аб пачатку якога суботняй раніцай паведамілі званы хрысціянскіх храмаў, прайшло на вуліцы Горкага. На ўчастку ад кальцавой развязкі бульвара Ленінскага камсамола да скрыжавання з вуліцай Даватара апранутыя ў святлоадбівальныя камізэлькі павышанай бачнасці навучэнцы школ № 12 і 33 утварылі жывы калідор. Стоячы на дзвюх палосах вуліцы, адны трымалі плакаты з прозвішчамі, імёнамі, узростам і датамі гібелі, другія — запаленыя лампадкі чырвонага, жоўтага і зялёнага колераў. На машыны павязваліся стужачкі з сімвалізуючым святлафор трыкалорам. Святары асвяшчалі транспартныя сродкі, маліліся за памерлых і тых, хто жыве. У канцы акцыі дзеці запусцілі ў неба белыя паветраныя шарыкі, якія сімвалізавалі душы загінулых у ДТЗ. Ва ўсіх каталіцкіх і праваслаўных храмах горада ў той дзень па іх адслужылі паніхіды.

  Першае падобнае мерапрыемства ў 2009 годзе ў Лідзе 3 верасня арганізавалі супрацоўнікі мясцовага аддзялення ДАІ. Тая акцыя стала беспрэцэдэнтным спосабам звярнуць увагу вялікай колькасці людзей на бяспеку дзяцей, не дапусціць іх гібелі і траўмавання на дарогах. Мяркуючы па тым, што на гэты раз у многіх, хто праязджаў і праходзіў па вуліцы Горкага, на вачах наварочваліся слёзы. Убачанае таксама ўразіла суграмадзян, сярод якіх было нямала жыхароў іншых рэгіёнаў Беларусі.

Алег Дук, старшы інспектар УДАІ УУС Гродзенскага аблвыканкама.