Аляксандры Герасімені прысвоена ганаровае званне "Мінчанін года"
Ганаровае званне "Мінчанін года" прысвоена 13 жыхарам сталіцы. Такое рашэнне напярэдадні Дня горада прыняў Мінгарвыканкам, паведамілі БЕЛТА ў прэс-службе мэрыі.
Права насіць такое званне гараджане заслужылі высокімі дасягненнямі ў працы, асаблівым асабістым укладам у сацыяльна-эканамічнае і культурнае развіццё Мінска па выніках работы за 2010-2011 гады.
Ганаровае званне "Мінчанін года" прысвоена: у галіне прамысловасці — гендырэктару ЗАТ "Вітэкс" Віктару Цярэшчанку, у галіне транспарту і сувязі — дырэктару аўтобуснага парка № 7 Уладзіміру Раманаву, у галіне будаўніцтва — муляру будаўнічага ўпраўлення № 256 ААТ "МАПІД" Фёдару Русаку, у галіне жыллёва-камунальнай гаспадаркі — дырэктару КУП "Мінсккамунцепласетка" Уладзіміру Аляксандраву, у галіне аховы здароўя — дырэктару РНПЦ "Маці і дзіця" Канстанціну Вільчуку, у галіне вышэйшай адукацыі і навукі — дырэктару Навукова-даследчага інстытута фізіка-хімічных праблем БДУ Таццяне Гаеўскай, у галіне сярэдняй адукацыі — настаўніку пачатковых класаў сярэдняй агульнаадукацыйнай школы № 99 Юліі Бяловай, у галіне культуры — балетмайстру Заслужанага аматарскага калектыву Беларусі ансамбля эстраднага танца "Гарэзлівыя агеньчыкі" Мінскага Палаца культуры і спорту чыгуначнікаў Валерыю Бураму, у галіне фізічнай культуры, спорту і турызму — спартсмену-інструктару нацыянальнай каманды Беларусі па плаванні, чэмпіёнцы свету па плаванні Аляксандры Герасімені, у сферы сацыяльнай абароны насельніцтва — старшыні грамадскага аб'яднання "Беларуская асацыяцыя шматдзетных бацькоў", Мінскай гарадской арганізацыі грамадскага аб'яднання "Беларуская асацыяцыя шматдзетных бацькоў" Таццяне Краўчанка, у сферы гандлю і грамадскага харчавання — дырэктару СЗАТ "Прастор Маркет" Інесе Захарэвіч, у сферы бытавога абслугоўвання — майстру ВКУП "Белхімчыстка" Людміле Комлік, у праваахоўнай сферы, органах і падраздзяленнях па надзвычайных сітуацыях, мытных органах, сілавых структурах — начальніку штаба галоўнага ўпраўлення ўнутраных спраў Мінгарвыканкама Ігару Тумашу.
Мінчанам года будуць уручаны дыпломы, нагрудныя знакі і грашовыя прэміі ў памеры 25 базавых велічынь (адна базавая велічыня складае Br35 тыс.) кожнаму. Урачыстая цырымонія адбудзецца ў час святкавання Дня горада 10 верасня ў Беларускім дзяржаўным акадэмічным музычным тэатры. Званне "Мінчанін года" прысвойваецца ў сталіцы з 2002 года.