Сітуацыя з пастаўкамі мяса ў Мінску стабілізавалася

Аб гэтым паведаміў першы намеснік начальніка галоўнага ўпраўлення спажывецкага рынку Мінгарвыканкама Аляксей Раманаў учора на аператыўнай нарадзе ў мэрыі, перадае БЕЛТА.

"Сітуацыя на спажывецкім рынку харчовых тавараў у сталіцы ўстойлівая. Захоўваецца павышаны попыт насельніцтва на мяса. Пастаўкі мяса ажыццяўляюцца па зацверджаных Мінгарвыканкамам і Мінсельгасхарчам графіках", — сказаў Аляксей Раманаў.

На мінулым тыдні міністэрствы гандлю, сельскай гаспадаркі і харчавання, а таксама Дзяржстандарт далі растлумачэнні аб парадку продажу сечанага мяса праз аб'екты рознічнага гандлю з прымяненнем схемы, прадугледжанай дзеючым заканадаўствам. "1 верасня Мінэканомікі прыняло пастанову, якой зацверджана адзіная гранічная адпускная цана, зацверджаны парадак цэнаўтварэння пры рэалізацыі сечанага мяса ў раздзелах па гатунковым і кулінарным прызначэнні. Вызначана прымяненне па гатунковым сечаным мясе гандлёвай надбаўкі ў памеры да 12 працэнтаў, па кулінарным — да 20 працэнтаў", — адзначыў Аляксей Раманаў, падкрэсліўшы, што ўступленне ў сілу пастановы Мінэканомікі дасць магчымасць стабілізаваць попыт і прапанаванне на мяса свініны на спажывецкім рынку горада.

Мінгарвыканкам склаў графік паставак мяса да канца гэтага года і вызначыў яго аб'ёмы для холадакамбінатаў, стабілізацыйных фондаў, фірменнай гандлёвай сеткі і для спецпаставак (для камбінатаў школьнага харчавання). Паводле слоў першага намесніка начальніка галоўнага ўпраўлення спажывецкага рынку, у верасні—снежні пастаўкі мяса па графіках будуць прадоўжаны, зацверджаны штомесячныя графікі пастаўкі мяса для сталічных холадакамбінатаў і па прамых гаспадарчых дагаворах, у тым ліку камбінатам школьнага харчавання, гандлёвым сеткам і фірменнаму гандлю.

На 5 верасня ў стабілізацыйны фонд горада пастаўлена 333 тоны свініны і 302 тоны ялавічыны, на холадакамбінаты — 350 тон свініны і 324 тоны ялавічыны.