Тыдзень актыўнага сонца, а ў суботу прыпячэ да 32

На гэтым тыдні холад адпусціць і ў Беларусь вернецца цяпло, паведаміла рэдакцыі спецыяліст Рэспубліканскага гідраметцэнтра Мінпрыроды Вольга Фядотава.

Аднак яшчэ ў аўторак атмасферны фронт з боку Заходняй Еўропы прынясе ў паўночна-ўсходнія рэгіёны Беларусі кароткачасовыя дажджы, у асобных раёнах — навальніцы. Тэмпература ўдзень 19—25 градусаў.

Пачынаючы з серады да нас завітае сур'ёзны антыцыклон, які будзе рухацца з боку Латвіі далей на цэнтральныя раёны еўрапейскай Расіі. Ціск павялічыцца, і ўсталюецца малавоблачнае без ападкаў надвор'е. Толькі ў сераду ў паўночна-ўсходніх раёнах прагназуюцца невялікія кароткачасовыя дажджы. Уначы на сераду чакаецца 9—15, удзень 20—26, у Брэсцкай вобласці — да плюс 28 градусаў. У чацвер яшчэ пацяплее. Уначы — 9—16, удзень 21—27, у Брэсцкай вобласці да 30 цяпла. У пятніцу і суботу захаваецца сонечнае надвор'е. Больш за тое, з боку Міжземнамор'я да нас прыйдзе чарговая порцыя цяпла, будзе без ападкаў. У гэтыя дні раніцай месцамі туман. Тэмпература ўначы ў пятніцу 9—16, удзень 22—28 градусаў, на захадзе краіны стане 29—31 цяпла.

Паводле папярэдніх прагнозаў, самым цёплым днём тыдня стане субота. Нават уначы чакаецца плюс 12—19, а ўдзень прыпячэ да 25—32 градусаў. Вольга Фядотава адзначыла, што такі тэмпературны фон прыкладна на 2—5 градусаў вышэй за кліматычную норму.

Згодна з доўгатэрміновымі прагнозамі, толькі ў нядзелю да нас зноў завітае чарговы атмасферны фронт, які прынясе навальнічныя дажджы ў паўночны захад Беларусі. Тэмпература паветра ўдзень будзе вагацца ад 23 цяпла на паўночным захадзе да 31 градуса на поўдні краіны. Мабыць, гэта і будзе апошні акорд цёплага лета...

Сяргей КУРКАЧ.