У Мінску праверылі гарышчы і падвалы ў сувязі з выбухам у метро

Сталічныя жыллёвыя службы ў сувязі з выбухам у метро 11 красавіка праверылі на мінулым тыдні падвалы і гарышчы жылых дамоў. Пра гэта паведаміў учора на аператыўнай нарадзе ў Мінгарвыканкаме генеральны дырэктар ГВА "Мінская гарадская жыллёвая гаспадарка" Уладзімір Рэянтовіч.

"Мы прынялі меры перасцярогі, памятаю пра выбухі жылых дамоў у Маскве некалькі гадоў таму, — адзначыў У. Рэянтовіч.— Правяралі, ці надзейна замкнутыя падвальныя і паддашкавыя памяшканні, што ў іх захоўваецца. Ёсць некаторыя складанасці з падваламі, дзе жыльцы абсталявалі кладоўкі. Грамадзяне не заўсёды замыкаюць за сабой уваходныя дзверы. Мы звярнулі на гэта ўвагу мінчан".

Цяпер, паводле слоў У. Рэянтовіча, усе падвальныя памяшканні замкнутыя. Ён падкрэсліў, што ў жылым фондзе сталіцы працягваецца планавая замена драўляных дзвярэй на металічныя. Сёння 85% дамоў абсталяваныя металічнымі дзвярамі.

Святлана ФРАЛЯНКОВА, "Мінск—Навіны".