Акцыя "Дапаможам Японіі разам" стартавала ў Беларусі
Беларускае таварыства Чырвонага крыжа распачало акцыю па зборы грошай для пацярпелых японцаў. А Федэрацыя прафсаюзаў рэспублікі прыняла рашэнне адправіць у Японію гуманітарную дапамогу.
— Мы стварылі спецыяльны рахунак, на які ўсе ахвотныя могуць пералічыць грошы, — паведамілі ў Чырвоным крыжы. — Пералічаныя сродкі пойдуць на закупку медыкаментаў, коўдраў, сродкаў асабістай гігіены, санітарнай ачысткі, пітной вады, медыцынскага абсталявання, адзення і інш. Чаму мы не збіраем рэчы? Справа ў тым, што японскі бок адмовіўся ад такой дапамогі. Ды і дастаўляць з Беларусі ў Японію рэчы будзе вельмі дорага. Таму мы збіраем грошы, каб пасля за іх закупіць неабходныя рэчы ў суседніх краінах.
Беларускія валанцёры Чырвонага Крыжа ў Японію не паедуць. Па словах Дзмітрыя Русакова, галоўнага спецыяліста па падрыхтоўцы і рэагаванні на надзвычайныя сітуацыі беларускага Чырвонага Крыжа, гэта досыць дорага і не вельмі эфектыўна.
— Мы маем падрыхтаваных валанцёраў, аднак на такія далёкія адлегласці звычайна іх не пасылаем. Валанцёрскія атрады нашы разлічаны на бліжэйшае замежжа — Расію, Украіну, Літву, Латвію, Польшчу і г.д., — паведаміў ён.
Па апошніх звестках, гуманітарную дапамогу Японіі прапанавалі 102 краіны, у тым ліку і нашы суседзі — Украіна і Расія. Расійскія выратавальнікі ўжо выехалі для аказання дапамогі.
Беларускія супрацоўнікі МНС пакуль ніякіх камандаў не атрымлівалі.
— У нас ёсць неабходныя спецыялісты і тэхніка, — паведамілі ў прэс-службе МНС. — Аднак рашэнне аб дапамозе прымаецца на высокім узроўні. Таму як толькі яно будзе, мы адразу зможам выехаць.
Згодна са звесткамі японскіх улад колькасць ахвяр на 16 сакавіка перавышае 4 164 чалавек. Агульная колькасць тых, хто загінуў і прапаў без вестак, складае больш за 12 тыс. чалавек
Настасся Занько.