Zамор'е

Пажылая брытанка збіла бандытаў сумачкай

Пажылая жыхарка Вялікабрытаніі прадухіліла рабаванне ювелірнай крамы ў горадзе Нортгемптан, разагнаўшы бандытаў пры дапамозе сваёй сумачкі.

Здзейсніць рабаванне ювелірнай крамы ў цэнтры Нортгемптана ўдзень вырашылі шасцёра бандытаў. Яны прыехалі да гандлёвай кропкі на мотаролерах і пачалі разбіваць кавадламі шкляныя дзверы і вітрыны ювелірнага цэнтра. Большасць з прахожых, якія былі сведкамі дзеянняў зламыснікаў, вырашылі не ўмешвацца. Аднак пажылая жанчына, якая ўбачыла, што адбываецца, кінулася да злачынцаў, схапіла сваю сумачку дзвюма рукамі і пачала біць ёю рабаўнікоў, якія ніяк не чакалі такога адпору ад сталага чалавека, і праз некалькі секунд вырашылі пакінуць месца здарэння. Злачынцы селі на мотаролеры (на іх рабаўнікоў чакалі іх саўдзельнікі) і паспрабавалі ўцячы. Тым не менш аднаго з іх змаглі затрымаць відавочцы здарэння, а яшчэ траіх праз некалькі хвілін арыштавала паліцыя. Двум злачынцам удалося ўцячы.

Нядаўна таксама ў Вялікабрытаніі адбыўся іншы падобны выпадак. У горадзе Слаў графства Беркшыр 74-гадовы пенсіянер паспрабаваў затрымаць банду зламыснікаў, якія выкралі з прыпаркаванага аўтамабіля дакументы. Калі пенсіянер заўважыў, што адзін са зладзеяў спрабуе ўцячы на веласіпедзе, ён накіраваў свой скутар у веласіпед, пазбавіўшы хулігана магчымасці з'ехаць. Пажылы брытанец зваліўся са скутара, але не пацярпеў. Злачынцам удалося збегчы, аднак супрацоўнікі следчага ведамства падзякавалі пенсіянеру за праяўленую адвагу.

Амерыканка паўгода аб'ядалася мылам і пральным парашком

На працягу паўгода 19-гадовая Тэмпест Хендэрсан, жыхарка Фларыды, з'ядала да пяці кавалкаў мыла на тыдзень, не грэбуючы і пральным парашком.

Са слоў дзяўчыны, упершыню паспрабаваўшы пральны парашок, яна знайшла яго незвычайна смачным — салёным і салодкім адначасова. Таксама ёй вельмі спадабаўся смак зялёнага мыла: стоячы пад душам, яна злізвала пену са сваёй скуры. Аб'ядаючыся мылам, Тэмпест адчувала сябе чысцейшай, чым тады, калі "проста" прымала ванну. Калі Хендэрсан, нарэшце, знайшла ў сабе сілы звярнуцца да лекара, ёй было дыягнастыравана рэдкае псіхічнае расстройства — PІCA (скажоны апетыт). Пакутуючыя на гэтае расстройства, людзі ядуць манеты, крэйду, батарэйкі, вугаль. Часам PІCA назіраецца ў цяжарных жанчын, аднак у гэтым выпадку "скажоны апетыт" тлумачыцца недахопам кальцыю ў арганізме.

На думку ўрачоў, прычынай узнікнення гэтага псіхічнага расстройства ў Хендэрсан стаў стрэс, перажыты дзяўчынай: яе бой-фрэнд вырашыў парваць усе адносіны з ёй, а сама Тэмпест апынулася далёка ад сваёй сям'і, паступіўшы ў каледж. Цяпер яна вярнулася дадому, дзе пад наглядам маці і дактароў спрабуе пазбавіцца ад сваёй "мыльнай залежнасці". Калі ў яе з'яўляецца жаданне адкусіць кавалачак ад бруска мыла, яна, паводле парады псіхолагаў, успамінае пра што-небудзь добрае. Аднак у доме сямейства Хендэрсан больш не карыстаюцца ні мылам, ні парашком — толькі вадкімі мыйнымі сродкамі. Паводле слоў Тэмпест, у яе чамусьці не ўзнікае жадання паспрабаваць вадкі "далікатэс".

Пудзеля забілі за неаплачаны гаспадыняй падатак

Рашэнне ўлад швейцарскага мястэчка Рэканвілье забіць жывёлу выклікала буру абурэння сярод грамадскасці. Мэр горада лічыць, што жывёла была забіта ў рамках закона, а значыць, правільна.

Людзей абурыла тое, што трохгадовы пудзель страціў жыццё за неаплачаны падатак на жывёлу ў памеры ўсяго толькі 50 швейцарскіх франкаў (38 еўра). Як высветлілі СМІ, гаспадыня сабакі Марылена Іаноцы не заплаціла падатак на валоданне чатырохногім гадаванцам не зламысна, а проста забылася своечасова гэта зрабіць. У выніку падатковыя інспектары забралі няшчаснага сабаку і не сталі нават слухаць абяцанняў жанчыны, што яна неадкладна выправіць дапушчаны промах і заплаціць неабходную суму.

Улады папярэджвалі пра пакаранне ўсіх забыўлівых уладальнікаў жывёл у канцы мінулага года. Як было абвешчана, уладальнікі сабак абавязаны былі выплаціць штогадовы падатак у 50 франкаў, у адваротным выпадку іх любімага гадаванца могуць забраць і ўсыпіць. Дзеянні ўлад не каральныя, паколькі падпадаюць пад 4 артыкул прынятага ў 1904 годзе закона гэтага кантона па падатку на сабак. Аднак рашэнне цяперашніх улад выклікала шок сярод абаронцаў жывёл і грамадскасці. Некаторыя абураныя грамадзяне нават прыстрашылі ў адказ забіць мэра. Раз'юшаныя абаронцы жывёл і экстрэмісты рознага кшталту заяўлялі ў пасланнях, што гатовыя на суровыя меры дзеля аднаўлення справядлівасці.

Бутэльку віна ацанілі ў 57 тысяч еўра

На вінным аўкцыёне ў Францыі топ-лотам стала бутэлька рэдкага жоўтага віна эпохі Людовіка XV. Гаворка ідзе пра бутэльку віна ўраджая 1773 года. Пакупніком стаў швейцарац П'ер Шэвр'е, які паведаміў, што мае намер выпіць набытае ім віно.

Прадстаўнік вінаробнага рэгіёна Юра, дзе вырабляецца жоўтае віно, выказаў задавальненне тым, што гэты гатунак нарэшце быў высока ацэнены падчас таргоў. Віно, пра якое ідзе гаворка, набывае бурштынава-жоўты колер дзякуючы натуральнаму закісанню вінаграду гатунку "Савіньён" позняга збору з выкарыстаннем адмысловых плёнкавых дражджэй. Віно спее ў дубовых бочках на працягу шасці і больш гадоў. Акрамя жоўтага віна, у вінаробным рэгіёне Юра вырабляецца таксама іншы ўнікальны гатунак віна — саламянае віно. Тым часам, самай дарагой бутэлькай віна, калі-небудзь прададзенай на аўкцыёне, лічыцца бутэлька Chateau Cheval-Blanc, за якую заплацілі больш за 200 тысяч еўра. Гэта адбылося летась у лістападзе на "вінных" таргах аўкцыённага дома Chrіstіe's.

У ЗША адбыўся забег аматараў пончыкаў

У горадзе Ролі, штат Паўночная Караліна, адбыўся забег з удзелам некалькіх тысяч аматараў пончыкаў.

Удзельнікам спаборніцтва Krіspy Kreme Challenge трэба было пераадолець дзве мілі (каля 3,2 кіламетра), забегчы ў краму пончыкаў, з'есці тузін смажаных у масле глазураваных піражкоў і бегчы назад.

Усяго для ўдзелу ў конкурсе зарэгістраваліся больш за 7,5 тысячы чалавек, аднак да фінішу здолелі прыйсці толькі 5,5 тысячы бегуноў-аматараў пончыкаў. Першым дыстанцыю пераадолеў 27-гадовы Джеф Глік. Ён выдаткаваў на забег і паглынанне пончыкаў крыху менш за 30 хвілін. Па правілах спаборніцтваў, удзельнікі мелі ў сваім распараджэнні не больш за гадзіну. Забег Krіspy Kreme Challenge насіў дабрачынны характар. У 2011 годзе аматарам пончыкаў удалося сабраць 100 тысяч долараў. Грошы будуць перададзены адной з дзіцячых бальніц штата.

Трактар будучыні

Трактар з назвай Deuterіum, разлічаны, магчыма, на суровыя кліматычныя ўмовы будучыні. Магутная машына будзе працаваць на вадародным паліве і вытрымліваць самыя цяжкія рэжымы працы.

Сярод асаблівасцяў — эрганамічны камфартабельны салон, рух у любым кірунку і павышаная ўстойлівасць, корпус з сонечнымі батарэямі, камеры начнога бачання з кругавым аглядам, gps-карты і сістэма навігацыі. І, вядома, у наяўнасці высоўная прылада для цяжкага абсталявання, каб араць зямлю.