Навагодні вальс

Сонцам асветлены шлях "Бяседы". У час зімовага сонцастаяння ішлі яе апошнія рэпетыцыі перад запісам. Упершыню ён адбыўся ў радыёстудыі перад навагоднім святам. І разам з гадавым кругабегам планеты, калі сонца паварочвае на лета, вядзецца адлік творчай дзейнасці ансамбля народнай музыкі Белтэлерадыёкампаніі.

Ля вытокаў шырока вядомага калектыву — кампазітар, прызнаны і ўшанаваны грамадствам. На той час Леанід Захлеўны ўжо меў ганаровае званне "Заслужаны дзеяч мастацтваў" (1986), быў лаўрэатам прэміі Ленінскага камсамола Беларусі, усесаюзных і рэспубліканскіх конкурсаў і фестываляў савецкай песні. У 1990 г. яго запрасілі ў Белтэлерадыёкампанію на працу з музычнымі калектывамі, а пасля распаду гурта "Жывіца" даручылі стварыць ансамбль народнай музыкі.

Духам і стылем творчасць Леаніда Захлеўнага блізкая да народных узораў. Ён закончыў Гродзенскае музычнае вучылішча па класе баяна, а ў Белкансерваторыі — клас кампазіцыі ў А. Багатырова, які сваіх студэнтаў заўсёды заахвочваў уважліва вывучаць фальклор — скарбніцу нацыянальнага духу.

І вось ужо два дзесяцігоддзі "Бяседа" ашчадна перадае сучаснаму пакаленню спеўнае хараство свайго народа, яго стваральны размах. За плённую працу ансамбль атрымаў званне "Заслужаны калектыў", а яго кіраўнік — "Народны артыст Беларусі", Дзяржаўную прэмію Беларусі, прэмію "За духоўнае адраджэнне".

У рэпертуар "Бяседы" арганічна ўвайшлі аўтарскія творы, якія мастацкай вобразнасцю сугучныя з народнымі. Песня "Навагодні вальс" Уладзіміра Карызны і Леаніда Захлеўнага — пяшчотна-лірычны абразок, напоўнены любоўю, святочнасцю.

Навагодні вальс

Кружыцца, кружыцца,

кружыцца, кружыцца

Снег, снег, снег.

А каля ёлкі сняжынкамі

дружнымі

Смех, смех, смех.

Шэпат твой мілы,

чароўна-сняжынкавы

Закружыў,

Думкі мае, нібы знічкаю,

сцяжынкаю

Запаліў.

Прыпеў:

Іскрыцца сняжынкамі свята

І гэтай зімовай парой

У сэрцы агеньчык заўзята

Распальвае светлы настрой,

Як быццам бы з цёплага

ўзлеску

Насустрач халоднай зіме

Туды прыляцелі пралескі

Сагрэць і цябе, і мяне.

Лёгкія-лёгкія, белыя-белыя

Нада мной

Кружацца ў вальсе

сняжынкі нясмелыя

Чарадой.

Ты на сняжынках

шчаслівай хвілінаю

Варажы,

"Любіш — не любіш" —

пад зоркаю сіняю

Мне скажы.

У гэтыя дні ансамбль народнай музыкі "Бяседа" адзначае дваццацігоддзе творчай дзейнасці. З юбілеем, сябры! Супрацоўнікі і чытачы "Звязды" горача віншуюць вас.

Падрыхтаваў Міхась ШАВЫРКІН.