АБЗАЦ

Жыхар Вілейкі захапіў таксі. Справа аб разбоі распачатая ў Вілейскім РАУС у дачыненні да 26-гадовага жыхара райцэнтра. Мужчына падазраецца ў тым, што 19 снежня здзейсніў разбойны напад на кіроўцу таксі, які падвозіў яго, і захапіў машыну. Нападнік накінуў кіроўцу на шыю вяроўку, аднак таму ўдалося выскачыць з машыны. Зламыснік, які знаходзіўся ў стане алкагольнага ап'янення, з'ехаў у невядомым кірунку. Для вышуку машыны і згоншчыка на тэрыторыі раёна ўводзіўся план "Перахоп". Аўтамабіль быў знойдзены, падазроны — затрыманы.

Грамадзянін Літвы спрабаваў перавезці наркотыкі праз беларускую мяжу. У пункце пропуску "Каменны Лог" смаргонскія памежнікі сумесна з супрацоўнікамі дзяржбяспекі і мытных органаў затрымалі аўтамабіль Mercedes пад кіраваннем грамадзяніна Літвы. Падчас вобыску ў машыне было выяўлена 8 пакетаў па 300 г, кожны з рэчывам расліннага паходжання, як мяркуецца, марыхуанай. Заведзена справа, праводзіцца разбор.

Штодзённае нанясенне макіяжу можа выратаваць жыццё, лічаць французскія навукоўцы. На іх думку, рытуал нанясення касметыкі адыгрывае ролю комплексу практыкаванняў, якія паляпшаюць каардынацыю рухаў і канцэнтрацыю ўвагі. Даследчыкі ва Універсітэце Святога Эцьена пратэсціравалі 100 жанчын ва ўзросце 65-85 гадоў. Яны выявілі, што тыя жанчыны, хто штодзень наносіў макіяж, вызначаліся лепшай каардынацыяй рухаў, больш лёгка захоўвалі раўнавагу і менш падалі. Шанц не памерці на працягу года ў выніку пералому шыйкі сцягна (найбольш распаўсюджаная траўма, якую атрымліваюць пажылыя людзі пры падзенні) павышаецца ў іх на 20%.   ПОЎНЫ АБЗАЦ  Журналіст прыйшоў у Вярхоўную Раду Украіны ў касцюме зайца. Вядучы праграмы "Сняданак з 1+1" Раман Вінтоніў стварыў сапраўдны ажыятаж у парламенце, калі прыйшоў браць інтэрв'ю ў дэпутатаў ў плюшавым касцюме навагодняга зайкі. Ён адзначыў, што вырашыў так апрануцца ў сувязі з апошнімі бойкамі ў Радзе. "Калі ВР ператвараецца ў цырк, то трэба афіцыйна прызнаць гэта і апранацца адпаведным чынам", — сказаў журналіст. Супрацоўнікі прэс-службы паспрабавалі вывесці яго з будынка парламента, але за яго заступіліся калегі, нагадаўшы, што ў парламенце адсутнічае дрэс-код для наведнікаў. Некаторыя з народных абраннікаў адмовіліся даваць каментары зайцу, а, напрыклад, "рэгіяналка" Юлія Левачкіна з задавальненнем сфатаграфавалася з ім.