Сустрэча маладых на парозе бацькоўскай хаты

На сучасных гарадскіх вяселлях распаўсюджаны звычай завяршаць маршрут вясельнага картэжу ля парога сталовай, кафэ ці рэстарана, дзе маладых будуць сустракаць бацькі. Аднак не спяшайцеся ехаць туды адразу ж пасля рэгістрацыі шлюбу.

Давайце ўспомнім шлях маладых ад самага пачатку:

1. Вясельны абрад пачынаецца ў хаце жаніха.

2. Затым са сваёй дружынай жаніх едзе па нявесту.

3. Вясельны картэж у поўным зборы паедзе ў загс — храм і наведае памятныя месцы.

4. З улікам таго, што рух вясельнага картэжу пабудаваны ў адпаведнасці з накірункам руху сонца, ён павінен пад'ехаць да хаты нявесты з правага боку. На парозе маладых сустрэнуць бацькі нявесты, і на працягу 1-2 дні вяселле будзе праходзіць у хаце маладой, з пераважным удзелам яе радні і некаторых запрошаных з боку жаніха.

5. Пасля таго, як у хаце нявесты будзе падзелены каравай, сабраны пасаг, маладыя паедуць працягваць вяселле ў хаце жаніха. Вясельны картэж і ў гэтым выпадку павінны выканаць агульнае патрабаванне: пад'ехаць да хаты "па сонцы". На парозе хаты іх сустрэнуць бацькі жаніха.

Нашым сучаснікам хочацца шчыра пажадаць закончыць рух вясельнага картэжу па крузе, тым самым замкнуць яго (кола) — а для гэтага неабходна вярнуцца, хай нават на некалькі хвілін, у бацькоўскую хату.

 Перад парогам хаты бацькі сустракаюць маладых хлебам-соллю.

 Хлеб-соль, з якім бацькі будуць сустракаць маладых, павінны ляжаць не на белай частцы ручніка, а на чырвонай, або на чырвоных яго канцах, зведзеных разам (сярэдзіну ручніка можна скласці ў некалькі разоў).

 Маці маладой трымае хлеб-соль, а бацька на падносе — бутэльку з гарэлкай і дзве чаркі. Бацька налівае маладым па чарцы гарэлкі (у ранейшыя часы гэта была медавуха), але піць яе нельга (!!!). Маладыя павінны паднесці чаркі да вуснаў, адчуць горкі смак і тут жа правай рукой выліць гарэлку цераз левае (!) плячо за спіну. З правага боку ў чалавека знаходзіцца анёл-захавальнік, а з левага — змей-спакуснік. Гэты рытуал паўтараецца. За трэцім разам чаркі неабходна разбіць, і зноў-такі правай рукой цераз левае плячо.

 Існуе прымета: шчаслівым і доўгім будзе шлюб у тым выпадку, калі абедзве чаркі разаб'юцца.

Аксана КАТОВІЧ, Янка КРУК.