Булка, Камка і Калдун
Тэлеканал АНТ запрашае на "Кухню"
На кухні няма забароненых тэм: тут можна гаварыць пра ўсё і ўсіх. Узброіўшыся народным дэвізам, АНТ стварыла ўласную "Кухню" — гумарыстычнае скетч-шоу.
Весці новы праект стануць Георгій Калдун, Яўген Булка і Мікалай Камка. І як абяцаюць сцэнарысты, вядучыя ў кожным выпуску "Кухні" разам з гасцямі будуць абмяркоўваць пытанні і падзеі, актуальныя для Беларусі.
Тэма першага эфіру — прэзідэнцкія выбары. І запрошаны на яго... Яўген Крыжаноўскі, мастацкі кіраўнік тэатра "Хрыстафор". Дзевяць гадоў таму Крыжаноўскі сам збіраўся стаць кандыдатам у прэзідэнты, і нават сабраў дзеля гэтай мэты 42 тысячы подпісаў...
Пра тое, што было б, каб Крыжаноўскі ўсё-ткі стаў прэзідэнтам, герой сам падзеліцца з гледачамі, уявіўшы, як змянілася б жыццё беларусаў.
Шоу стартуе ў вячэрнім эфіры тэлеканала 26 верасня.
Ілья ЛАПАТО.