АБЗАЦ

У праваслаўных вернікаў учора пачаўся Пятроўскі пост. Ён устаноўлены царквой па прыкладзе святых апосталаў, якія, прыняўшы Святога Духа ў дзень Пяцідзесятніцы, у посце і малітве рыхтаваліся да сусветнай пропаведзі Евангелля. Пятроўскі пост нагадвае, што галоўны вораг не той, хто забівае цела, а той, што ўнутры душы. У посце чалавек вучыцца падпарадкоўваць цялесныя патрэбы свайму духу, як гэта рабілі многія святыя. Пятроў пост з'яўляецца нястрогім. Згодна з царкоўным звычаем, рыба ў гэты пост дазваляецца ва ўсе суботы, нядзелі, а таксама святочныя дні. Алей ядуць ва ўсе дні, акрамя серады і пятніцы. Скончыцца пост 11 ліпеня.

Па віне кіроўцы без правоў, жыхара Баранавічаў 1963 г.н., у Дзятлаўскім раёне пацярпелі пажылыя жанчыны 1940, 1932 и 1927 г.н. Каля 13.30 нядзелі на бабулек, якія сядзелі на лаўцы каля хаты непадалёк ад дарогі, наехалі "Жыгулі". Жанчыны былі дастаўленыя ў бальніцу, дзе дзве з іх памерлі. Усяго за мінулую нядзелю ў ДТЗ у Беларусі загінула 8 чалавек.

Падробленыя купюры на Br3,5 млн канфіскаваныя ў жыхароў Дзяржынскага раёна. У вёсцы Мігдаловічы ў касе райпа пры пераліку грашовай выручкі, якая паступіла з крамы, было выяўлена чатыры падробленыя купюры наміналам Br20 тыс. У той жа дзень загадчыца іншай мясцовай крамы выявіла тры аналагічныя фальшыўкі. Аператыўнікі ўстанавілі, што падробленыя купюры збылі два мясцовыя жыхары, адзін з якіх нідзе не працуе, а другі — рабочы дзіцячага саду, раней судзімы за крадзеж. Пры вобыску па месцы жыхарства аднаго з падазроных выяўлена і канфіскавана 175 падробленых купюр па Br20 тыс. і 5 лістоў фармату А4 з надрукаванымі банкнотамі ў Br10 тыс. Паводле слоў падазроных, фальшыўкі яны знайшлі на сметніку ў суседняй вёсцы. Аднак замест таго каб звярнуцца ў міліцыю, збылі частку падробак у мясцовых крамах пры разліку за прадукты харчавання.