АБЗАЦ

Паводле звестак СААЗ, штогод у свеце 5 млн чалавек падвяргаюцца змяіным укусам, 2,5 млн такіх выпадкаў звязана з пашкоджаннем ядам. Ад гэтага прыкладна 100 тыс. чалавек паміраюць і каля 300 тыс. становяцца інвалідамі. Асноўныя ахвяры — дзеці і фермеры, якія жывуць у бедных сельскіх абшчынах, дзе няма належным чынам аснашчаных медпунктаў.

Авіябомбы часоў Першай сусветнай вайны знойдзены ў Ашмянскім раёне. Боепрыпасы былі знойдзеныя пры правядзенні зямельных работ па пракладцы газаправода на станцыі Ашмяны ў жылым сектары па вуліцы Кастрычніцкай. Спачатку работнікі "Смаргоньсельгазбуда" ў выкапанай траншэі знайшлі пяць бомбаў. Выкліканыя на месца сапёры з дапамогай мінашукальніка знайшлі ў агульнай колькасці 13 авіяцыйных бомбаў і 76-міліметровы артылерыйскі снарад часоў Першай сусветнай вайны, а таксама дэтанатар і шэсць запалаў да гранат часоў Вялікай Айчыннай вайны. Тэрыторыю, дзе былі знойдзены боепрыпасы, ачапілі. Снарады вывезлі ў бяспечнае месца і абясшкодзілі.

Пацыент цэнтральнай раённай бальніцы ў горадзе Ляхавічы загінуў, упаўшы з 4-га паверха. Яго цела выявілі ў ноч з 4 на 5 мая. Мужчына 1959 г.н. нідзе не працаваў. На момант трагедыі ён праходзіў лячэнне ў тэрапеўтычным аддзяленні. Спіртным не злоўжываў. Пракуратура праводзіць праверку. Пакуль асноўная версія — самагубства.

Пракуратура Гродзенскай вобласці завяла крымінальную справу адносна дырэктара ААТ "Гроднарыба". Дырэктар падазраецца ў тым, што сёлета ў лютым-сакавіку яна дала ўказанне падначаленым перафасаваць пратэрмінаваную рыбную прадукцыю на Br50 млн у іншую тару з пазначэннем новага тэрміну годнасці. Тым самым нанесены ўрон правам і інтарэсам спажыўцоў.

У эстонскім горадзе Палдыскі пяцігадовае дзіця задушыла на аўтамабілі 69-гадовую жанчыну. У рукі 5-гадовага хлопчыка нейкім чынам трапілі ключы ад бацькоўскага аўтамабіля Реugеоt. Дзіця змагло завесці машыну, якая была прыпаркаваная з уключанай задняй перадачай. Як сцвярджаюць сведкі, аўтамабіль пачаў рухацца назад і наехаў на жанчыну. Ад удару жанчына ўпала і памерла ад атрыманых пашкоджанняў.

У Запарожскай вобласці супрацоўнікі Дзяржаўтаінспекцыі аштрафавалі нябожчыка. Сям'і памерлага мелітопальца па пошце паведамілі, што на яго нерухомасць накладаецца арышт з-за нявыплаты штрафу ў 300 грыўняў за парушэнне ПДР. Як аказалася, машынай, што ўказаная ў дакуменце, мужчына ніколі не валодаў, да таго ж парушэнне было здзейсненае ў маі 2009 года, тады як адрасат памёр яшчэ ў сакавіку 2007-га. Пасля высветлілася, што пры адпраўцы паведамлення чыноўнікі дапусцілі грубую памылку — у сапраўднасці штраф быў накладзены на іншага чалавека з такім жа прозвішчам.

Цырульнік Кевін Алмонд з англійскага графства Кент забараніў кліентам весці размовы аб выбарах у брытанскі парламент. Такое рашэнне ён прыняў пасля таго, як у яго салоне ўспыхнула гучная спрэчка паміж прыхільнікам лейбарыстаў і кліентам, які падтрымлівае кансерватараў. Дайшло амаль што да рукапрыкладства. "Ад гэтай пары наша цырульня — зона, вольная ад размоў пра палітыку", — адзначыў Алмонд. Згодна з уведзенымі цырульнікам правіламі, кожны кліент, хто ўзняў тэму выбараў, павінен будзе заплаціць штраф. Сабраныя такім чынам грошы будуць перададзеныя на дабрачыннасць.