Заробкі работнікаў бібліятэк і архівістаў Віцебскай вобласці павысяцца прыкладна на 200 тысяч рублёў — за сродкі мясцовага бюджэту

Пераймай!

Заробкі работнікаў бібліятэк і архівістаў Віцебскай вобласці павысяцца прыкладна на 200 тысяч рублёў — за сродкі мясцовага бюджэту

— Гэта не нармальна, калі бібліятэкар зарабляе 550 тысяч рублёў у месяц. Такая зарплата ў іх была ў сярэднім за люты, — кажа губернатар. — Мы знойдзем сродкі, каб павялічыць яе прынамсі на 200 тысяч рублёў.

Пры наведванні Віцебскай абласной бібліятэкі губернатар распарадзіўся надбудаваць над трыма існуючымі паверхамі яшчэ пару — не толькі дзеля таго, каб павялічыць плошчу залаў абслугоўвання чытачоў:

— Трэба адкрыць тут сучасныя залы для арганізацыі выстаў у тым ліку і пастаяннай экспазіцыі рарытэтных кніг. Неабходна адкрыць кавярню, каб не выходзячы з будынка, можна было наведвальнікам перакусіць, наогул адпачыць пасля інтэлектуальных заняткаў, — дзеліцца найбліжэйшымі планамі губернатар. — Неабходна стварыць сучасныя ўмовы для захавання фонду бібліятэкі, які трэба значна павялічыць. Патрэбныя камп'ютары для чытачоў з выхадам у інтэрнэт, праз віртуальнае "павуцінне" арганізаваць выхад з бібліятэкі на Нацыянальную ў Мінску, а потым на бібліятэкі Санкт-Пецярбурга, Масквы. Выдзелім сродкі і на стварэнне ўмоў для наведвання дзецьмі бібліятэкі. Хай тут гуляюць і ў камп'ютары. Чаму б і не? Наогул трэба развіваць платныя паслугі. Але перад гэтым трэба ўкласці грошы ў развіццё бібліятэкі.

Акрамя гэтага, губернатар даручыў прадумаць, дзе можна будзе з нуля пабудаваць новы будынак Віцебскай абласной бібліятэкі: у новым буйным мікрараёне Білева або недалёка ад цэнтральнай плошчы горада Перамогі — на вуліцы Герцэна.

Цяперашні будынак абласной бібліятэкі даўно патрабуе кардынальных зменаў. Як заўважыў губернатар, па ўзроўні яна больш нагадвае сельскую. Толькі на мадэрнізацыю ўстановы плануюць патраціць мінімум 3,5 мільярда рублёў.