Мілінкевіч і Борыс у аўторак выправяцца з візітам у Брусэль

У сераду і чацвер у Брусэлі адбудзецца міні-сесія Еўрапарламента, прысвечаная Беларусі. Прадстаўнікі Беларусі таксама будуць мець нефармальныя сустрэчы з кіраўніцтвам Еўракамісіі на самым высокім узроўні.

Анжаліку Борыс затрымлівалі і штрафавалі, а яе памочнікаў пасадзілі на суткі.

Беларуская праблема вярнулася на парадак дня ЕС, пасля таго як беларускія ўлады ўзмацнілі націск на Саюз палякаў Беларусі і незалежнае грамадства. У часе свайго паседжання ў панядзелак у Брусэлі Рада міністраў ЕС мае правесці кансультацыі адносна Беларусі. А ў сераду-чацвер на міні-сесію па беларускім пытанні збярэцца Еўрапарламент (ЕП).

Узяць удзел у ёй запрошаныя старшыня Саюза палякаў Беларусі Анжаліка Борыс і старшыня Руху за Свабоду Аляксандр Мілінкевіч.

Яны сустрэнуцца з усімі найбуйнейшымі фракцыямі парламента, а таксама са старшынём ЕП Ежы Бузкам. Запланаваная таксама іх прэс-канферэнцыя.

Міні-сесія Еўрапарламента скончыцца прыняццем рэзалюцыі.

У Брусэлі будуць рашаць, што рабіць з рэжымам Аляксандра Лукашэнкі далей. Як стала вядома НН, Мілінкевіч і Борыс будуць мець таксама нефармальныя сустрэчы ў Еўракамісіі на ўзроўні еўракамісара.

Анжаліка Борыс — лідэрка незалежнага Саюза палякаў Беларусі. Ён стаў аб’ектам цкавання. Першая хваля яго прыпала на 2005 годзе, а сёлета, ізноў за год да прэзідэнцкіх выбарах, пачаўся новы накат. Міліцыя заняла Польскі Дом у Івенцы — мястэчку на заходняй Міншчыне.

Аляксандр Мілінкевіч, экс-кандыдат у прэзідэнты і лаўрэат прэміі Еўрапарламента імя Сахарава, быў адным з творцам канцэпцыі пашырэння сувязяў Еўропы з Беларуссю, нягледзячы на аўтарытарнасць рэжыму ў Мінску. Гэты падыход даў плён у выглядзе адноснай лібералізацыі эканомікі і грамадскага жыцця Беларусі. Дзякуючы пашырэнню сувязяў з ЕС, Мінск аслабіў сваю залежнасць ад Масквы і заняў агульнаеўрапейскую пазіцыю ў пытанні Абхазіі і Асеціі. Аднак далейшае развіццё адносінаў зайшло ў тупік. Эксперты канстатуюць захаванне манаполіі на ўладу ў Беларусі, працяг русіфікацыйнай палітыкі ў сферы ідэнтычнасці і прывілеяваныя пазіцыі расійскага капіталу ў эканоміцы, умацаваныя Мытным саюзам.

Працяг ранейшае палітыкі ЕС пастаўлены пад сумнеў пад ціскам грамадскай думкі Польшчы. Яна настроеная рэзка крытычна пасля апошніх атак на Анжаліку Борыс. Польшча, між тым, — галоўны творца беларускай палітыкі ЕС. Зрэшты, і іншыя ўплывовыя ў ЕС структуры не бачаць пераменаў у Беларусі. Хрысціянскія дэмакраты, з’яднаныя ў Еўрапейскую народную партыю, былі шакаваны нерэгістрацыяй Беларуская Хрысціянскай Дэмакратыі. Рада Еўропы так і не дачакалася адмены смяротнага пакарання.

У такой сітуацыі ў сталіцы ЕС захацелі пачуць голас беларускай апазіцыі. Увядзенне эканамічных санкцый супраць Беларусі малаімаверна, хоць у Варшаве, у тым ліку ў польскім Сейме, пра іх загаварылі. Аднак агульнае стаўленне да Лукашэнкі на вачах мяняецца.