Расiя папярэдзiла ЕС аб магчымых збоях з пастаўкамi нафты

Расiя папярэдзiла Еўрасаюз аб тым, што можа прыпынiць пастаўкi нафты праз Украiну ў Славакiю, Чэхiю i Венгрыю з-за спрэчкi аб коштах. Аб гэтым заявiлi ў мiнiстэрстве эканомiкi Славакii, спаслаўшыся на лiст з ЕС.

Прэм'ер-мiнiстр Славакii Роберт Фiцо склiкаў урад сваёй краiны на экстраннае пасяджэнне ў сувязi з сiтуацыяй, якая склалася.

Вялiкая частка расiйскай нафты пастаўляецца ў Еўропу па нафтаправодзе "Дружба". Па паўночным участку палiва iдзе праз Беларусь, Польшчу, Германiю, Латвiю i Лiтву, а па паўднёвым — па тэрыторыi Украiны, Чэхii, Славакii i Венгрыi.

Нагадаем, што ў 2009 годзе Расiя прыпыняла пастаўкi ў краiны ЕС газу, якi перапраўляўся ў Еўропу праз украiнскiя газаправоды. На працягу двух тыдняў краiны кантынента не атрымлiвалi палiва з-за спрэчкi РФ i Украiны аб тарыфах.

Са свайго боку Украiна назвала прычыны магчымага збою паставак нафты з Расii ў ЕС.

Умовы кантракту, па якiм расiйская нафта цяпер пастаўляецца праз тэрыторыю Украiны ў ЕС, павiнны быць адкарэктаваныя. Аб гэтым заявiў прадстаўнiк украiнскай транспартнай кампанii "Укртранснафта" Сяргей Зiнкевiч. Менавiта ў сувязi з гэтым пастаўкi расiйскай нафты ў Славакiю, Чэхiю i Венгрыю могуць быць прыпыненыя.

Раней, як паведамляе агенцтва Reuters, кiраўнiк "Транснафты" Мiкалай Токараў заявiў, што ўкраiнскi бок вылучыў "непрымальныя" ўмовы па пераглядзе транзiтных кантрактаў. У прыватнасцi, Украiна запатрабавала павышэння кошту транзiту нафты, а таксама гарантый аб'ёму палiва, якое перакачваецца. Паводле слоў Токарава, ён спадзяецца, што да новага года бакам атрымаецца ўрэгуляваць узнiклыя складанасцi. Аднак ён папярэдзiў, што ў выпадку, калi Украiна будзе настойваць на сваiх умовах, "Транснафта" перагледзiць аб'ём будучых паставак палiва.