У два разы можа быць зменшаны падатковы цiск для экспарцёраў, што прымяняюць спрошчаную сiстэму падаткаабкладання

Антыкрызiсная эканомiка

Мiнiстэрства эканомiкi падрыхтавала прапановы па змяненнi ўмоў спрошчанай сiстэмы падаткаабкладання, заявiў учора на брыфiнгу Дзмiтрый Кiйко, намеснiк начальнiка ўпраўлення бюджэтна-падатковай палiтыкi Мiнiстэрства эканомiкi. Па яго словах, сёння спрошчаная сiстэма падаткаабкладання запатрабаваная — ёй карыстаюцца больш за 70 тыс суб'ектаў малога i сярэдняга бiзнэсу. Але каб падключыць бiзнэс яшчэ i да нарошчвання экспарту, былi падрыхтаваныя змяненнi ва Указ Прэзiдэнта ад 9 сакавiка 2007 года № 119:

— Прапануецца знiзiць стаўку падатку для арганiзацый i ІП, якiя прымяняюць спрошчаную сiстэму падаткаабкладання ў частцы экспарту тавараў, — сказаў Дзмiтрый Кiйко. — Яе памер складзе 3 % ад выручкi рэалiзуемых на экспарт тавараў, то бок падатковы цiск знiзiцца больш чым у 2 разы.

Па словах Дзмiтрыя Мiкалаевiча, праект змяненняў ва ўказ прайшоў усе неабходныя ўзгадненнi i накiраваны на разгляд кiраўнiку дзяржавы. Таксама запланаваныя змены i па наёмных працаўнiках:

— У рамках гэтага ж праекта прапануецца даць права арганiзацыям наймаць да 15 чалавек наёмных працаўнiкоў у сферы рознiчнага гандлю i грамадскага харчавання. Гэтая лiчба павялiчыцца з 5 наёмных працаўнiкоў i дазволiць арганiзацыям выплачваць падатак з валавога даходу, а не з аб'ёму валавой выручкi.

Таксама Дзмiтрый Кiйко нагадаў, што з 1 студзеня 2010 года плануецца ўвесцi ў дзеянне Асаблiвую частку Падатковага кодэкса:

— У яго рамках будзе рэалiзаваны такi важны напрамак, як адмена абаротных падаткаў, што дазволiць павысiць канкурэнтаздольнасць беларускiх тавараў на ўнутраным i знешнiм рынках, прадпрыемствам — праводзiць больш гнуткую палiтыку, бо будзе меншы цiск на цэны, — паведамiў журналiстам Дзмiтрый Кiйко. — Таксама мяркуецца змянiць прынцып улiку затрат пры падаткаабкладаннi прыбытку. Калi сёння мы жорстка рэгламентуем тыя затраты, што адносяцца на сабекошт, то ў рамках Асаблiвай часткi Падатковага кодэкса прынцып ад зваротнага: дазволена ўсё, што не забаронена. Будзе вызначаны пералiк затрат, якiя не ўлiчваюцца пры падаткаабкладаннi, а адпаведна ўсе астатнiя затраты будуць памяншаць падатковую базу па прыбытку.

Акрамя гэтага, мусiць быць адменена нармаванне затрат на рэкламу, маркетынгавыя даследаваннi i кансультацыйныя паслугi, а таксама запланавана знiжэнне стаўкi падатку на прыбытак у адносiнах да дывiдэндаў з 24 % да 12 % (для фiзiчных асобаў — з 15 % да 12 %).

Што датычыцца падатку на дабаўленую вартасць (ПДВ), то пытанне пра яго павышэнне з 18 % да 20 % яшчэ не вырашанае.