Дзве даты. 30 кастрычніка

1728 год — нарадзiўся Марцiн Пачобут-Адлянiцкi, беларускi астраном, асветнiк. Член Лонданскага каралеўскага таварыства (1770), член-карэспандэнт Парыжскай АН (1778). Вучыўся ў Гродзенскiм i Полацкiм езуiцкiх калегiумах i Вiленскай езуiцкай акадэмii. Удасканальваў адукацыю ў Чэхii, Нямеччыне, Італii, Францыi. Выкладаў у Полацку старажытнагрэчаскую мову. Адзiн з арганiзатараў i першы дырэктар Вiленскай астранамiчнай абсерваторыi. З 1764 года — прафесар Вiленскай акадэмii, адначасова рэктар Галоўнай школы ВКЛ. Вёў сiстэматычныя назiраннi за зоркамi i планетамi, выявiў невядомае сузор'е. Вызначыў геаграфiчныя каардынаты Вiльнi, Гродна i iншых гарадоў. Унёс значны ўклад у развiццё асветы i папулярызацыю прыродазнаўства i матэматыкi. Яго iмем названы адзiн з кратараў на зваротным боку Месяца.

1905 год — цар Мiкалай II, напалоханы разгортваннем першай рускай рэвалюцыi, падпiсаў манiфест "Аб удасканаленнi дзяржаўнага парадку". Манiфест абвяшчаў недатыкальнасць асобы, свабоду слова, сходаў, саюзаў, стварэнне Дзяржаўнай думы з заканадаўчымi правамi i ўдзелам народных прадстаўнiкоў ад усiх расiйскiх саслоўяў.