Калі Расія адключыць газ

У Беларусі распрацаваны варыянты энергазабеспячэння народнай гаспадаркі і насельніцтва ва ўмовах магчымага скарачэння паставак энерганосьбітаў.

Пра гэта паведаміў намеснік міністра эканомікі Анатоль Філонаў 14 кастрычніка на пасяджэнні прэзідыума Савета міністраў, дзе абмяркоўваўся ход падрыхтоўкі народнай гаспадаркі краіны да працы ў восеньска‑зімовы перыяд.

Паводле слоў Філонава, Міністэрства энергетыкі з удзелам канцэрна «Белнафтахім» і іншых зацікаўленых ведамстваў «распрацавала варыянты паліўвазабеспячэння і рэжымаў энергазабеспячэння народнай гаспадаркі і насельніцтва ў ацяпляльны перыяд ва ўмовах магчымага зніжэння паставак энерганосьбітаў у рэспубліку, а таксама ў выпадках магчымага ўзнікнення аварыйных сітуацый і рэзкіх пахаладанняў».

Намеснік міністра таксама паведаміў, што па ўзгадненні з аблвыканкамамі і Мінгарвыканкамам зацверджаны графікі абмежаванняў і адключэння спажыўцоў ад газавых, электрычных і цеплавых сетак у выпадку ўзнікнення аварыйных сітуацый.

Для забеспячэння аўтаперавозак з выкарыстаннем дызельнага паліва ў зімовых умовах канцэрнам «Белнафтапрадукт» дадзена даручэнне нафтаперапрацоўчым заводам пачаць 15 кастрычніка вытворчасць і рэалізацыю зімовага дызельнага паліва.

Філонаў зазначыў, што ў цэлым па краіне праведзена значная праца па падрыхтоўцы да працы ў восеньска‑зімовы перыяд. Разам з тым, ёсць адставанне па афармленні пашпартоў гатоўнасці да працы ў ацяпляльны перыяд. Па стане на 8 кастрычніка было зарэгістравана 17 тыс. 998 пашпартоў гатоўнасці спажыўцоў да прыёму цеплаэнергіі, што складае 86,7% ад задання. У Мінску зарэгістравана толькі 79,3% пашпартоў гатоўнасці.

Першы віцэ‑прэм’ер Уладзімір Сямашка на пасяджэнні заявіў, што ў цэлым Беларусь гатова да ацяпляльнага сезона 2009/2010. Разам з тым, падкрэсліў ён, гэты год у плане падрыхтоўкі да ацяпляльнага сезона быў асаблівы з‑за фінансава‑эканамічнага крызісу.

«Ва ўмовах недахопу пэўнай сумы сродкаў мы павінны былі падрыхтавацца да зімы, і якіх‑небудзь паслабленняў са спасылкай на тое, што не хапае сродкаў, не павінна было быць», — зазначыў Сямашка.

Паводле звестак на 13 кастрычніка, спажыўцы Віцебскай і Магілёўскай абласцей падключаны да цеплавой энергіі на 100%, Мінскай — на 99%, Гомельскай і Гродзенскай — адпаведна на 93 і 94%, Брэсцкай — на 72%, Мінска — на 80%. Такім чынам, усяго па Беларусі цяпло атрымалі 91% спажыўцоў.

Як заявіў Сямашка, «некалькі насцярожвае сітуацыя з негатоўнасцю усіх пашпартоў гатоўнасці спажыўцоў і цеплакрыніцаў». «Той, хто гэтага не зрабіў дагэтуль, — рызыкуе, бо могуць растлумачваць у іншым месцы, калі штосьці адбудзецца», — падкрэсліў першы віцэ‑прэм’ер.