Калякіна і Карняенку не выпусцілі з Беларусі

Беларускія памежнікі ня выпусцілі з краіны каардынатара кампаніі "За свабодныя выбары" Віктара Карняенку і старшыню партыі "Справядлівы свет" Сяргея Калякіна. Палітыкі накіроўваліся ў Літву. Пра забарону на выезд з Беларусі Карняенку і Калякіну паведамілі на памежным пункце "Каменны Лог" беларуска-літоўскай мяжы. Тлумачэнняў адмовы не далі.

 

"Мы ехалі на аўто па зялёным калідоры. Праз 15 хвілін, як мы аддалі дакумэнты на пашпартны кантроль, да нас падышоў старэйшы змены і паведаміў, што ў выезде з Беларусі нам адмоўлена. Аддаў пашпарты без ніякіх пазнакаў і загадаў вярнуцца назад", — паведаміў "Свабодзе" Віктар Карняенка.

Ён заўважыў, што не атрымліваў паведамленняў пра забарону на выезд ад дзяржаўных органаў, як таго патрабуе закон. Апошні раз ён выязджаў за мяжу 23 лютага і тады ніякіх праблемаў пры выездзе не ўзнікла.

7 сакавіка старшыня Аб’яднанай грамадзянскай партыі Анатоль Лябедзька ня змог выехаць у Літву. На памежным пункце "Каменны Лог" беларускія памежнікі забаранілі яму перасячэнне дзяржаўнай мяжы. Тлумачэнняў адмовы не далі. Сам Лябедзька лічыць, што трапіў у чорны сьпіс апазыцыянэраў, якім улады забаранілі выяжджаць у краіны ЕСу.

Беларускія ўлады афіцыйна не пацвярджаюць наяўнасць такога спісу.