Урад Беларусі прапануе змяніць умовы выдачы льготных крэдытаў на будаўніцтва жылля

Аб гэтым заявіў учора журналістам намеснік прэм'ер-міністра Анатоль Калінін на ўрачыстай цырымоніі адкрыцця міжнароднай спецыялізаванай будаўнічай выстаўкі "Будпрагрэс-2011", перадае БЕЛТА.

Урад выносіць на разгляд кіраўніку дзяржавы прапанову змяніць умовы выдачы льготных крэдытаў на будаўніцтва жылля, паведаміў віцэ-прэм'ер. "Я пакуль не магу сказаць, чым гэтыя змяненні будуць адрознівацца ад папярэдніх, але ранейшымі застануцца ўмовы крэдытавання для шматдзетных сем'яў і для катэгорый сацыяльна не абароненых слаёў насельніцтва, якія прапісаны ва ўказе № 185. Для іх мы прапануем крэдыт пад 5 працэнтаў на 20 гадоў", — адзначыў Анатоль Калінін. Астатнія, хто не ўваходзіць у прапісаную ва ўказе катэгорыю, будуць будаваць жыллё на агульных асновах, згодна з умовамі банка.

"Таксама ўрад прапануе новыя ўмовы крэдытавання для жыхароў сельскіх паселішчаў колькасцю да 20 тыс. чалавек. Раней сельскім жыхарам прадастаўляўся крэдыт пад 1 працэнт на 40 гадоў, цяпер мы прапануем — 3 працэнты на 20 гадоў", — паведаміў віцэ-прэм'ер. Анатоль Калінін адзначыў, што такія ўмовы крэдытавання, як 1 працэнт на 40 гадоў, прадугледжваюць "атрыманне па сутнасці бясплатнай кватэры". "Цяпер мы павінны знаходзіць новыя формы крэдытавання. Для гэтага ўрад неаднаразова раіўся з фінансавымі органамі, банкаўскім сектарам. Гэта пакуль праектныя прапановы, але ў бліжэйшы час яны будуць разгледжаны". Анатоль Калінін падкрэсліў: "Эканоміка краіны цяпер гаворыць аб тым, што ранейшай долі льготнага крэдытавання на будаўніцтва жылля дзяржава дазволіць сабе ўжо не можа. Але мы прадоўжым будаваць жылыя дамы для тых, каму гэта неабходна, а тыя, хто мае жыллё, але каму недастаткова метраў для пражывання, будуць вымушаны шукаць менш ільготныя ўмовы".

Падрыхтаваны праект указа аб выдзяленні маючым патрэбу зямельных участкаў пад будаўніцтва

У Беларусі падрыхтаваны праект указа аб выдзяленні зямельных участкаў для маючых патрэбу пад індывідуальнае будаўніцтва, паведаміў намеснік прэм'ер-міністра Анатоль Калінін.

"Ва ўказе прапанаваны шэраг мер абароны: чалавек, які атрымаў зямельны ўчастак, не зможа прадаць яго на працягу доўгага перыяду", — паведаміў Анатоль Калінін. Так, уладальнік участка павінен паставіць на ім каробку, вокны, накрыць дахам, толькі пасля гэта праз 8 гадоў ён атрымае права рэалізаваць яго. Гэта, на думку віцэ-прэм'ера, стане перашкодай для спекулянтаў, якія ёсць у гэтым бізнэсе. "А тыя, хто атрымліваюць участкі, каб будавацца, не будуць мець ніякіх абмежаванняў і праблем". Анатоль Калінін паведаміў, што на будаўніцтва дома на ўчастку будзе адведзена 5 гадоў. Далей па ўважлівай прычыне гэты тэрмін можа быць прадоўжаны яшчэ на 3 гады па ўзгадненні з мясцовымі органамі. Затым пры неабходнасці ўладальнік участка можа закансерваваць будаўніцтва яшчэ на 2 гады. "Такім чынам, ва ўладальніка ўчастка ёсць 10 гадоў на будаўніцтва дома, і толькі пасля праз 8 гадоў ён будзе мець права яго прадаць", — падкрэсліў намеснік прэм'ер-міністра.

Сёння ў чарзе на атрыманне ўчастка знаходзяцца 50 тыс. чалавек, паведаміў віцэ-прэм'ер. "Кіраўнік дзяржавы паставіў задачу ў гэтым годзе забяспечыць усіх, у першую чаргу тых, хто пражывае на гэтых тэрыторыях", — адзначыў ён. Сёння дзяржава гатова прапанаваць 65 тыс. участкаў, але ўсе хочуць атрымаць участкі або ў Мінскім раёне, або ў прыгарадах абласных цэнтраў. Віцэ-прэм'ер падкрэсліў, што, хоць у Мінскім раёне і ёсць праблема з участкамі, у самой вобласці свабодных тэрыторый дастаткова, каб забяспечыць усіх, і яшчэ ёсць рэзерв.

У 2012 годзе будзе пабудавана амаль 5,8 млн кв.м жылля

Аб гэтым паведаміў Анатоль Калінін.

"У гэтым годзе ёсць адставанне па ўводзе жылля ў эксплуатацыю ў параўнанні з 2010 годам. На 2011 год запланавана пабудаваць 7,280 млн кв.м жылля, але з улікам інфляцыйных працэсаў і іншых змяненняў у эканоміцы нашай краіны мы плануем да канца года наблізіцца да паказчыка 7 млн кв.м жылля, — паведаміў Анатоль Калінін. — Што датычыцца 2012 года, то пры ўсіх змяненнях мы плануем увесці ў эксплуатацыю 5,7-5,8 млн кв.м жылля".

Пры гэтым віцэ-прэм'ер падкрэсліў, што толькі 40 працэнтаў запланаванага на наступны год жылля будзе будавацца за кошт ільготнага крэдытавання, астатняе — на агульных камерцыйных умовах. "У Мінску сёння 50 працэнтаў жылля будуецца на камерцыйных умовах, і гэты паказчык будзе павялічвацца", — адзначыў ён.  

Рэпартаж з выстаўкі