Распрацаваны праект указа аб стварэнні ў Беларусі Следчага камітэта

Кіраўнік дзяржавы Аляксандр Лукашэнка 5 верасня правёў рабочую сустрэчу з дзяржаўным сакратаром Савета Бяспекі Беларусі Леанідам Мальцавым.

Дзяржсакратар Савета бяспекі далажыў Аляксандру Лукашэнку аб выніках работы за месяц па стварэнні ў Беларусі Следчага камітэта. На нарадзе 2 жніўня па пытанні ўдасканалення сістэмы органаў папярэдняга расследавання Прэзідэнт даручыў, каб такая структура пачала работу з 1 студзеня 2012 года.

Работа па стварэнні Следчага камітэта ідзе ў планавым парадку. Цяпер распрацаваны праект адпаведнага ўказа, у якім вызначаны функцыі, структура, статус усіх супрацоўнікаў, парадак фінансавання новай структуры і іншыя пытанні. На працягу месяца плануецца вызначыць штатную колькасць Следчага камітэта і яго цэнтральнага апарату, а праз два месяцы будзе распрацавана палажэнне аб Следчым камітэце. Адпаведныя дакументы прадставяць на зацвярджэнне Прэзідэнту.

На думку Леаніда Мальцава, стварэнне Следчага камітэта дасць магчымасць узмацніць абарону грамадзян у прававых адносінах, паколькі гэта структура будзе падпарадкоўвацца непасрэдна кіраўніку дзяржавы, што дасць магчымасць прадухіліць ведамасны націск і максімальна выключыць магчымасць неабгрунтаванага прыцягнення да адказнасці.

Прэс-служба Прэзідэнта Рэспублікі Беларусь.