Пасольства Беларусі ў Токіа ўстанавіла кантакты з 75 грамадзянамі Беларусі

Аб гэтым паведаміў учора начальнік упраўлення інфармацыі — прэс-сакратар МЗС Беларусі Андрэй Савіных на брыфінгу, адказваючы на пытанні журналістаў, перадае карэспандэнт БЕЛТА.

Міністэрства замежных спраў Беларусі вядзе маніторынг сітуацыі ў Японіі пасля землетрасення і цунамі. "Сітуацыя даволі складаная. У сувязі з гэтым мы рэкамендуем беларускім грамадзянам устрымацца ад паездак у гэту краіну да стабілізацыі абстаноўкі", — падкрэсліў афіцыйны прадстаўнік беларускага МЗС.

Пры гэтым ён адзначыў, што асаблівую заклапочанасць выклікае абстаноўка на японскіх атамных станцыях "Фукусіма-1" і "Фукусіма-2".

"Мы ўважліва аналізуем афіцыйную інфармацыю кампетэнтных органаў Японіі і экспертаў МАГАТЭ", — сказаў Андрэй Савіных.

МЗС рэкамендуе беларускім грамадзянам, якія знаходзяцца ў прэфектурах Міягі, Фукусіма і Іватэ, пераехаць у паўднёвыя раёны краіны або пакінуць Японію рэгулярнымі рэйсамі.

Андрэй Савіных падкрэсліў, што цяпер прапрацоўваецца варыянт дзеянняў на выпадак пагаршэння абстаноўкі.