Пасол Расіі: Перамога Лукашэнкі была чаканай, а апазіцыі трэба вучыцца

Перамога Аляксандра Лукашэнкі на выбарах была чаканай, заявіў 23 снежня на прэс-канферэнцыі ў Менску амбасадар Расеі ў Беларусі Аляксандр Сурыкаў.

«Мы чакалі далёка за 70% галасоў у Лукашэнкі, так яно і адбылося. Нам было ўсё зразумела з самага пачатку», — сказаў Сурыкаў.

Ён падкрэсліў, што ўсё было ясна і беларускай апазіцыі, якая «з самага пачатку рабіла стаўку на Плошчу». «Гэта была спроба жоўтай, аранжавай рэвалюцыі, спроба засвяціцца перад Захадам», — сказаў Сурыкаў.

На яго думку,

беларускай апазіцыі трэба вучыцца ствараць і структураваць партыі, каб партыі маглі весці агітацыю сярод выбаршчыкаў не толькі ў год выбараў.

«Тады можна нейкіх вынікаў чакаць, — адзначыў амбасадар. — А па нашым назіранні, нават у выбарчых участковых камісіях апазіцыйныя кандыдаты, калі скласці ўсе разам, не змаглі запоўніць 6000 месцаў».

Ён падкрэсліў, што

беларускай апазіцыі «трэба вучыцца змагацца і перамагаць у нармальнай канкурэнтнай барацьбе, а не займацца дзіцячымі гульнямі».