...і Вышэйшага органа Мытнага саюза

Беларуская дэлегацыя на чале з прэм’ер-міністрам Сяргеем Сідорскім удзельнічае ў пасяджэнні Савета кіраўнікоў урадаў СНД, Міждзяржсавета ЕўрАзЭС і Вышэйшага органа Мытнага саюза, якія праходзяць сёння ў Санкт-Пецярбургу.

Як паведаміла прэс-служба ўрада РФ, прэм’ер-міністры краін СНД абмяркуюць пытанні развіцця супрацоўніцтва ў эканамічнай, гуманітарнай галінах і сферы бяспекі — усяго 22 праекты дакументаў.

«Будзе разгледжаны ход падрыхтоўкі праекта Дагавора аб зоне свабоднага гандлю, закліканага замяніць больш чым 100 дзейных пагадненняў і зняць шэраг захаваных бар’ераў ва ўзаемным гандлі. Мяркуецца, што Дагавор будзе гатовы да падпісання кіраўнікамі ўрадаў СНД у першым паўгоддзі наступнага года», — гаворыцца ў паведамленні прэс-службы.

На пасяджэнні таксама плануецца ўхваліць План прыярытэтных мерапрыемстваў у сферы гуманітарнага супрацоўніцтва на 2011–2012 гады. Ён распрацаваны з улікам аб’яўлення 2011 года Годам гісторыка-культурнай спадчыны, а 2012 года — Годам спорту і здаровага ладу жыцця ў СНД.

Прэм’еры абмяркуюць праект пагаднення аб супрацоўніцтве ў галіне прававой аховы і абароны інтэлектуальнай уласнасці, які прадугледжвае стварэнне адпаведнага Міждзяржаўнага савета.

На пасяджэнні Міждзяржсавета ЕўрАзЭС плануецца ўхваліць мерапрыемствы па рэалізацыі Прыярытэтных кірункаў развіцця арганізацыі на 2011–2013 і наступныя гады, а таксама заслухаць інфармацыю аб выкананні ў 2008–2010 гадах Канцэпцыі міжнароднай дзейнасці Садружнасці, паведамляе прэс-служба ўрада РФ.

Плануецца таксама разгледзець праект Дагавора аб звароце гаспадарчых суб’ектаў у Суд ЕўрАзЭС па спрэчках у рамках Мытнага саюза. Гэты дакумент прадугледжвае пашырэнне кампетэнцыі суда, парадак абскарджання яго рашэнняў і працэдурныя пытанні судовага разбору.

Чакаецца, што прэм’еры зацвердзяць план мерапрыемстваў па рэалізацыі Канцэпцыі харчовай бяспекі дзяржаў ЕўрАзЭС, які прадугледжвае стварэнне і развіццё адзінай міждзяржаўнай тавараправоднай сістэмы сельскагаспадарчай прадукцыі, сыравіны і харчавання, а таксама супрацоўніцтва ў галіне падрыхтоўкі высокакваліфікаваных кадраў для патрэб сельскай гаспадаркі.

На пасяджэнні Вышэйшага органа Мытнага саюза (МС) Беларусі, Казахстана і Расіі плануецца прыняць рашэнне аб уваходжанні ў сілу чатырох дакументаў, якія фарміруюць дагаворна-прававую базу Мытнага саюза. У іх ліку — пагадненне аб сакратарыяце Камісіі МС, пратаколы аб унясенні змяненняў у пагадненні МС па санітарных і ветэрынарна-санітарных мерах, а таксама пратакол аб унясенні змяненняў у пагадненне МС аб каранціне раслін.

Акрамя таго, удзельнікі сустрэчы абмяркуюць Канцэпцыю стварэння інтэграванай інфармацыйнай сістэмы знешняга і ўзаемнага гандлю МС, а таксама заслухаюць інфармацыю аб ходзе выканання Плана дзеянняў па фарміраванні Адзінай эканамічнай прасторы (АЭП), паведамляе прэс-служба ўрада РФ.

АЭП у рамках Мытнага саюза «тройкі» павінна запрацаваць з 1 студзеня 2011 года, заявіў 17 лістапада на Беларускім інвестыцыйным форуме ў Франкфурце-на-Майне прэм’ер-міністр Беларусі Сяргей Сідорскі. Паводле яго слоў, АЭП будзе «падобная на тое эканамічнае ўтварэнне, якое існуе ў Еўрасаюзе».