НЕ ЗНІЖАЮЧЫ РЫТМУ РАБОТЫ
Выступленне Старшыні Палаты прадстаўнікоў Нацыянальнага сходу Рэспублікі Беларусь Андрэйчанкі У.П. на закрыцці пятай пазачарговай сесіі Палаты прадстаўнікоў Нацыянальнага сходу Рэспублікі Беларусь чацвёртага склікання.
Паважаныя дэпутаты!
Паважаныя запрошаныя і журналісты!
Завяршае работу пятая пазачарговая сесія Палаты прадстаўнікоў Нацыянальнага сходу Рэспублікі Беларусь чацвёртага склікання.
Яна была непрацяглая, але з-за маштабнасці разгледжаных пытанняў яе вынікі вельмі значныя як для вырашэння бягучых сацыяльна-эканамічных задач, так і для вызначэння шляхоў развіцця краіны на перспектыву.
Унікальнасць праведзенай сесіі вызначаецца і тым, што ніколі раней падрыхтоўка і прыняцце праекта Закона аб рэспубліканскім бюджэце не праходзілі ў такім аператыўным і напружаным рэжыме. Пры гэтым трэба адзначыць высокую якасць законапраекта, якая была дасягнута дзякуючы прафесійнай арганізацыі справы і канструктыўнаму ўзаемадзеянню ўсіх зацікаўленых, уключаючы дэпутатаў Палаты прадстаўнікоў.
Прыняцце пакета дакументаў, накіраваных на ўдасканаленне бюджэтна-фінансавай і падатковай сфер, дасць магчымасць значна ўмацаваць прававы фундамент праводзімай у краіне палітыкі па лібералізацыі эканомікі, разняволенні прадпрымальніцкай ініцыятывы і забеспячэнні эфектыўнага пасткрызіснага развіцця.
Асаблівую актуальнасць гэтыя рашэнні набываюць у кантэксце падрыхтоўкі да правядзення чацвёртага Усебеларускага народнага сходу.
Для дэпутацкага корпуса значнасць прынятых заканадаўчых актаў яшчэ і ў тым, што ў іх вызначаны арыенціры, з улікам якіх трэба праводзіць нашу заканатворчую работу, у тым ліку над законапраектамі, намечанымі да разгляду ў ходзе чарговай шостай сесіі Палаты прадстаўнікоў, да адкрыцця якой засталося ўжо менш як месяц.
Адметнай асаблівасцю будучай сесіі стане тое, што значная частка пытанняў будзе мець сацыяльную накіраванасць. У ліку найбольш рэзанансных законапраектаў трэба назваць Кодэкс аб адукацыі, Жыллёвы кодэкс, Закон "Аб зваротах грамадзян і юрыдычных асобаў".
Цяпер у пастаянных камісіях знаходзіцца ўжо больш як 50 законапраектаў і прагназуецца, што агульная колькасць пытанняў парадку дня сесіі вырасце як мінімум удвая. Трэба таксама адзначыць даволі насычаную праграму міжнароднага і міжпарламенцкага супрацоўніцтва.
Паважаныя дэпутаты, мы прынялі рашэнне аб правядзенні 19 снежня 2010 года выбараў Прэзідэнта Рэспублікі Беларусь. З улікам значнасці гэтай падзеі для краіны нас чакае сур'ёзная і адказная арганізацыйна-палітычная работа як у Парламенце, так і ў выбарчых акругах, каб выбары Кіраўніка дзяржавы прайшлі адкрыта, дэмакратычна, у строгай адпаведнасці з Канстытуцыяй.
Як бачым, рытм нашай дэпутацкай дзейнасці будзе напружаны. Таму, завяршаючы сваё выступленне, хачу пажадаць усім моцнага здароўя, рабочага настрою і нацэленасці на якасную падрыхтоўку маючай адбыцца сесіі.