Сёння будуць прызначаныя прэзідэнцкія выбары

Сёння на савеце палаты прадстаўнікоў нацыянальнага сходу прынята рашэнне зацвердзіць праект парадку пасяджэння пазачарговай сесіі. Сярод іншых пытанняў там значыцца абмеркаванне даты правядзення прэзідэнцкіх выбараў у Беларусі.

Дэпутаты маюць намер прыняць сёння пастанову Палаты прадстаўнікоў «Аб прызначэнні выбараў Прэзідэнта Рэспублікі Беларусь», паведамляе БЕЛТА.

Згодна з заканадаўствам, выбары павінны прайсці праз тры месяцы пасля дня іх прызначэння і быць праведзеныя ў нядзелю.

Такім чынам найбліжэйшая дата іх правядзення 19 снежня 2010 года.

А крайні тэрмін правядзення -- 6 лютага 2011 года, і таму крайняя дата прызначэння выбараў 6 лістапада 2010 года. Прэзідэнцкія паўнамоцтвы Лукашэнкі сканчаюцца 6 красавіка 2011 года.