Някляеў, Вазьняк і Дзьмітрыеў знаходзяцца ў Ленінскім РУУС

Актывісты кампаніі "Гавары праўду" Уладзімер Някляеў, Сяргей Вазьняк і Андрэй Дзьмітрыеў знаходзяцца цяпер ў міліцыі Ленінскага раёну Менску. Іх прывезьлі туды для правядзеньня сьледчых дзеяньняў, якія пачнуцца а 14 гадзіне.Пра гэта Свабодзе паведаміў Дзьмітры Яненка са спасылкай на адвакатку Ларысу Атаманчук.

Допыт будзе праводзіць сьледчая Вікторыя Юхневіч. Адвакаты затрыманых для прысутнасьці на допыце ня выклікаліся. Назіральнікі робяць выснову, што магчыма сьледзьва вырашыла выканаць фармальныя працэдуры і адпусьціць затрыманых.