Два тыдні прайшло з таго часу, як некалькі фотаздымкаў клумбаў каля гарадскіх устаноў і арганізацый было апублікавана на старонках «СП». Безумоўна, сякая-такая рэакцыя на крытыку адчулася: уладальнікі кветнікаў іх прапалолі, прыбралі леташняе лісце і сухую расліннасць, высадзілі петуніі, бягоніі, аксаміткі. Вось толькі ці сталі гэтыя клумбы ўпрыгожваннем горада? На смех, і ніяк іначай, атрымаліся яны.
…У мінулым годзе надалася магчымасць пабываць на Дубровеншчыне (невялічкі райцэнтр у Віцебскай вобласці). Мушу прызнацца, што моцна ўразіла кветкавае афармленне горада, пачынаючы ад жывых упрыгожванняў у новых мікрараёнах да дэкаратыўнага афармлення клумбы ў самым сэрцы райцэнтра, ля Дубровенскага выканаўчага камітэта. Адчувалася, што ў кожнай кветкавай кампазіцыі густ, фантазія, умелыя рукі, любоў. Найперш любоў да таго, што стваралася.
Дык чаму ўсяго гэтага нам не хапае?