Дачка загінулага віцябляніна з COVID-19: "Спадзяюся, у людзей адкрыюцца вочы”

Раніцай 31 сакавіка ў Віцебску памёр 75-гадовы акцёр Віктар Дашкевіч, у якога некалькі дзён таму пацвердзілі каранавірусную інфекцыю. Малодшая дачка акцёра Ганна, якая жыве ў Санкт-Пецярбургу, расказала Еўрарадыё, як падступная хвароба забрала яе бацьку і чаму ў сям'і лічаць, што Віктар мог заразіцца COVID-19 ужо пасля таго, як трапіў у Віцебскую бальніцу.

— Бацькі прыхварэлі, бацьку паставілі дыягназ "ангіна". Паклалі ў агульную палату. Збілі тэмпературу. Бацька пайшоў на папраўку, але потым яму рэзка стала горш. У першай бальніцы бацькам зрабілі тэст на каранавірус, — расказвае Ганна. — Яго перавялі ў іншую бальніцу і адразу ў рэанімацыю для таго, каб падтрымліваць лёгкія пры дапамозе ШВЛ, у яго былі праблемы з лёгкімі. Маці выпусцілі з бальніцы дадому. Але потым патэлефанавалі, сказалі, што прыедуць санітары, таму што ў бацькі каранавірус пацвердзіўся.

Мы прытрымліваемся думкі, што, хутчэй за ўсё, гэта ў бальніцы бацьку заразілі. Маці ўсё прадэзынфікавала ў кватэры, яны з бацькам ляжалі ў розных палатах. Ёсць шанц, што яе гэтая доля абміне, яна сябе больш-менш пачувае.

Жонка акцёра Святлана цяпер знаходзіцца дома пад наглядам. Ёй нельга выходзіць з кватэры. Старэйшая дачка пакідае ўсё неабходнае каля дзвярэй.
 

Еўрарадыё: У маці дыягназ не пацвердзіўся?

— Я не ведаю, ці рабілі ёй паўторны аналіз. Маці цяпер пад так званым хатнім арыштам, не можа выходзіць два тыдні, яе нават не адпусцяць развітацца з татам. Назірае паліцыя [міліцыя. — Еўрарадыё] за кватэрай, гэта крымінальная адказнасць.

Еўрарадыё: Ёй сказалі, каб яна нікуды не выходзіла з дома?

— Так. Хацелі спачатку адправіць у санаторый нейкі абсталяваны, але дамовіліся, што "давайце вы паседзіце дома, пад чэснае слова, але пад наглядам". Сястра да гэтага начавала ў мамы дзве ночы. Ёй сказалі: "Сачыце за сваім здароўем".

Як відаць, развітацца з Віктарам Дашкевічам ні Святлана, ні Ганна не змогуць.

— Я ў Санкт-Пецярбургу, не магу прыехаць, у нас горад закрыты. Сястра кажа, што не будзе ніякай паніхіды, проста ў моргу развітаюцца самыя блізкія, яна і яе мужчына, таму што маму не выпусцяць. Пляменніку таксама сказалі не прыязджаць, — расказвае яна.

Еўрарадыё: Ці ёсць ужо афіцыйнае заключэнне дактароў?

— Заключэнне аб смерці пакуль не аддалі, але сказалі, што, хутчэй за ўсё, будзе іншы дыягназ. Пакуль мы не бачылі дакумента, нічога сцвярджаць не магу. Але мама кажа, што, яшчэ пакуль тата быў жывы, ёй дакладна і зразумела сказалі, што ў яго каранавірус. Прычым жанчына, якая прыходзіла, сказала, што за суткі было ўжо афіцыйна пацверджана 6 выпадкаў. А мы гуляем у хакей і п'ём гарэлку.

Мама казала, што дактары працуюць на знос. Яны самі як паддоследныя трусы. Доктар-рэаніматолаг, які апошні меў зносіны з бацькамі, наогул начуе ў іншым месцы, каб не вяртацца на ноч у сям'ю, таму што ён сам не ведае, на што ён можа хварэць у цяперашні час.

Еўрарадыё: Цяпер па вуліцах ходзяць пажылыя людзі, каранціну няма...

— Я згодная, гэта ненармальна. У Піцеры ў нас таксама бясстрашныя бабулі, якія ў каранціне атакуюць прадуктовыя [крамы]. Але нашы бабулі хоць бы ў масках ходзяць. Дарослыя людзі ў большасці пераходзяць на аддаленую работу. Я вельмі спадзяюся, што ў людзей [у Беларусі] адкрыюцца вочы.