Вяртанне дадому

Вяртанне дадому

З расійскім бокам узгоднены алгарытм дзеянняў па вывазе беларускіх грамадзян з трэціх краін у сувязі са спыненнем з 27 сакавіка рэгулярных і чартарных авіязносін з расійскіх аэрапортаў у аэрапорты замежных дзяржаў і ў зваротным напрамку, за выключэннем палётаў, звязаных з вывазам расійскіх грамадзян на тэрыторыю РФ з замежных дзяржаў у сувязі з распаўсюджваннем каранавіруса COVID-19. Аб гэтым БелТА паведамілі ў прэс-службе пасольства Беларусі ў Расіі.
«У адпаведнасці з палажэннямі аб роўных правах грамадзян, замацаванымі ў Дагаворы аб стварэнні Саюзнай дзяржавы, вываз беларускіх грамадзян з трэціх краін будзе ажыццяўляцца нараўне з расійскімі грамадзянамі на аснове эвакуацыйных спісаў. Яны падрыхтаваны беларускімі загранустановамі на падставе зваротаў грамадзян, якія знаходзяцца за мяжой», — падкрэслілі ў дыпмісіі.
Беларускіх грамадзян у Маскву будуць дастаўляць расійскія чартары. З аэрапортаў Дамадзедава і Шарамецева прадугледжаны транзіт у Беларусь рэгулярнымі рэйсамі авіякампаніі «Белавія».
«Грамадзянам, прыбываючым ва Унукава пасля праходжання пагранічнага кантролю, санітарна-эпідэміялагічнага кантролю Расспажыўнагляду і ўзгаднення спісаў з аператыўным штабам пры МУС РФ, пасольства Беларусі ў Расіі будзе аказваць садзейнічанне ў пераездзе ў Дамадзедава аўтобусамі ў суправаджэнні Дзяржаўнай інспекцыі бяспекі дарожнага руху», — запэўнілі ў дыппрадстаўніцтве.