В интересах осиповщины

Абраны кандыдатуры ў абласны Маладзёжны парламент!

Прапанаваць карысныя для ўсіх ідэі, рэалізаваць праекты, знайсці аднадумцаў, пераймаць вопыт дзеючых дэпутатаў — усё гэта магчыма для членаў Маладзёжнага парламента пры раённым Савеце дэпутатаў. Днямі моладзь вырашыла выйсці на новы ўзровень: правялі сход, дзе вызначылі кандыдатуры тых, хто будзе прадстаўляць Асіповіччыну на абласным узроўні.

Адказная задача па выбары лепшых з лепшых легла на прадстаўнікоў Маладзёжнага парламента, дэпутатскага корпуса, райвыканкама, працоўных калектываў, райарганізацый БРСМ і «Белая Русь». Усяго права голаса меў     21 чалавек, а яшчэ частку прысутных абралі ў прэзідыум і кантралюючыя камісіі.

Старшыня прэзідыума старшы інспектар РАНС Раман Сярчэня прапанаваў абраць у абласны Маладзёжны парламент настаўніка гісторыі СШ № 3 Ілону Шпак. Дзяўчына — дэпутат райсавета дэпутатаў, удзельнічае ў экалагічным маладзёжным грамадскім аб’яднанні «Дзеля жыцця на Зямлі», майстар спорту Беларусі па баявым мастацтве Вьет Во Дао. Таксама паступіла прапанова з зала ўключыць у склад кандыдатаў мясцовага актывіста, выконваючага абавязкі першага сакратара райкама БРСМ Арцёма Рымара. Дарэчы, і Ілона, і Арцём уваходзяць у склад раённага Маладзёжнага парламента. У падтрымку кандыдатур выказаліся старшыня райсавета дэпутатаў Сяргей Сувееў і начальнік аддзела ідэалагічнай работы, культуры і па справах моладзі райвыканкама Ірына Раманчук. Упаўнаважаныя адзінагалосна прагаласавалі за абодвух маладых людзей. А напрыканцы парады і пажаданні Ілоне Шпак і Арцёму Рымару, якія цяпер будуць прадстаўляць асіповіцкую моладзь у вобласці, выказалі памочнік дэпутата Палаты прадстаўнікоў Нацыянальнага сходу Святланы Шутавай Віталь Кулакоў і дэпутат Магілёўскага аблсавета дэпутатаў Віталь Бродскі.

Марыя ТАЛЕЙКА.

m.taleiko@gzt-akray.by