У Нясвіжскай цэнтральнай раённай бібліятэцы імя Паўлюка Пранузы з 18 па 24 лютага прайшоў Тыдзень роднай мовы.
Чытачам бібліятэкі і ўсім жадаючым было прапанавана паўдзельнічаць у акцыях “Сэлфі па-беларуску”, падчас якой неабходна было зрабіць фота ці відэа з беларускімі словамі і апублікаваць у сацсетках з пазнакай “#Нясвіж чытае”, і “Любі-мае беларускае слова”, якое наведвальнікі бібліятэкі запісвалі на рознакаляровыя паперкі і замацоўвалі на лічбе 21. Цікавымі былі і сумесныя акцыі з аўтамабільным паркам № 8 у грамадскім транспарце — “Вучымся размаўляць па-беларуску разам” і “Пазнай больш сакавітых слоў” (сумесна з БРСМ на вуліцах горада).
Маладыя людзі з абмежаванымі магчымасцямі,
наведвальнікі Нясвіжскага РТЦСАН са спецыялістам
па сацыяльнай рабоцеАксанай Пяткевіч (злева)
Але самае цікавае адбылося менавіта ў Дзень роднай мовы — 21 лютага.
Малодшыя чытачы бібліятэкі сустрэліся з беларускай пісьменніцай Кацярынай Хадасевіч-Лісавой, якая прэзентавала сваю новую кнігу “Ключ ад Вялікай Каштоўнасці”, а таксама пазнаёміла з героямі сваіх кніг, якія ўжо знайшлі свайго чытача.
Вучні пачатковых класаў паўдзельнічалі ў майстар-класе “Нясумнае чытанне: чытаем і ствараем” па стварэнні герояў дзіцячых беларускіх кніг і паспрабавалі сябе ў ролі найлепшых чытальнікаў твораў на роднай мове.
Старшакласнікі і навучэнцы Нясвіжскага дзяржаўнага каледжа імя Якуба Коласа мелі магчымасць праверыць свае веды падчас традыцыйнай дыктоўкі, якую правяла для іх пісьменніца, сябра Міжнароднай асацыяцыі пісьменнікаў і публіцыстаў, раённага літаратурна-музычнага аб’яднання “Валошкі” Зоя Кулік.
Завіталі ў той дзень у бібліятэку і маладыя інваліды, наведвальнікі Нясвіжскага тэрытарыяльнага цэнтра сацыяльнага абслугоўвання насельніцтва разам са сваімі кіраўнікамі Таццянай Хоміч і Аксанай Пяткевіч. Бібліятэкар дарослага абанемента Аксана Кунаш прапанавала ім інтэлектуальную гульню “Мова родная — мова модная”. Моладзь слухала беларускія вершы і песні ў выкананні вядомых беларускіх артыстаў, тлумачыла значэнне беларускіх слоў і паспрабавала сябе ў ролі перакладчыкаў з рускай на беларускую мову. Дарэчы, лепшым перакладчыкам паказаў сябе снаўчанін Дзяніс Бушмялёў.
Многія ўдзельні гульні — даўнія чытачы бібліятэкі. У той дзень, пасля мерапрыемства, яны ўзялі для чытання кнігі беларускіх аўтараў, якія размяшчаліся на выставах “Смак беларускай мовы”, “Да кніжных скарбаў дакраніся”, “Роднага слова святло”, “Будзь у трэн-дзе: чытай беларускае”.
Тыдзень роднай мовы змяніў-ся іншым, дні пабеглі ў вядомым ім напрамку. Але вельмі б хацелася, каб пабачанае і пачутае ў бібліятэцы з вуснаў пісьменнікаў і бібліятэкараў надоўга пасялілася ў сэрцы, лепш, вядома, назаўсёды. І каб мы не “вучыліся размаўляць па-беларуску разам”, у сталыя гады асвойваючы родныя словы. Няхай наша мова стане жывой крыніцай, няхай ліецца яна з вуснаў татаў і матуль, выхавацеляў і першых настаўнікаў. Тады яна не будзе госцяй, якую запрашаюць толькі аднойчы, а стане гаспадыняй кожнага наша дня.
Валянціна Шчарбакова, бібліятэкар Нясвіжскай цэнтральнай
раённай бібліятэкі
імя Паўлюка Пранузы.
Фота Святланы Польскай.