Иван Малькевич — лучший участковый инспектор

Бліц-інтэрв’ю: Іван Малькевіч, участковы інспектар міліцыі аддзела аховы правапарадку і прафілактыкі міліцыі грамадскай бяспекі РАУС

Раскажыце пра сябе.

— Родам з Вялікай Гарожы. Скончыў Інстытут МУС па спецыялізацыі «Правазнаўства. Адміністрацыйна-прававая дзейнасць». У 2017 годзе прыйшоў на службу ў РАУС у якасці ўчастковага інспектара міліцыі і з таго часу абслугоўваю Аўтазавадскі ўчастак: гэта так званы Бам, прамысловая зона АЗАА, «ТехноНИКОЛЬ», «Сонца» і іншых прадпрыемстваў, гаражныя кааператывы.

Не так даўно Аўтазавадскі быў адным з самых шматнаселеных і крымінальных раёнаў горада. А цяпер?

— Ацэньваю сітуацыю на сваёй «зямлі» як стабільную і цалкам здавальняючую. Вядома, і тут ёсць «гарачыя кропкі», асабліва па выхадных: адна з іх — каля кругласутачнай крамы, якая да нядаўняга часу суседнічала яшчэ і з барам. А гэта — перманентны доступ да спіртнога і, як следства, поўны спектр хуліганства: ад абразы пешаходаў і работнікаў гандлю да боек. Але пакаранне, паверце, сябе чакаць не прымушае — грамадскі парадак наводзім хутка.

Па абавязку службы вы маеце цесныя зносіны з людзьмі. З якімі праблемамі часцей за ўсё звяртаюцца да ўчастковага?

— У асноўным гэта ўжо ўзгаданае п’янства: жонкі скардзяцца на нецвярозых мужоў-дармаедаў, якія нярэдка распускаюць рукі, суседзі — на п’яных дэбашыраў за сценкай. Сямейных скандалістаў — а кожны з іх патэнцыяльны злачынца — стаўлю на ўлік. Такіх трэба наведваць раз у месяц, але прыходжу часцей: ведаю, што гэта можа мець эфект. Усё залежыць ад настрою чалавека: хоча выправіцца — дапаможам, не жадае — прымем меры. Напрыклад, у мінулым годзе двое грама-дзян адправіліся ў лячэбна-працоўны прафілакторый — Аўтазавадскі яшчэ трохі пацішэў.

Галоўныя якасці ўчастковага інспектара — гэта…

— Прафесіяналізм і, як яго частка, уменне ўнікаць у сутнасць пытання, аддзяляць, як кажуць, збожжа ад пустазелля. Вядома, участковыя рэдка раскрываюць рэзанансныя злачынствы, аднак менавіта мы бліжэй за ўсіх да людзей, да нас яны ідуць з набалелымі пытаннямі — і нават калі ўчастковы не зможа вырашыць праблему сам, ён заўсёды дасць прафесійны савет, як дзейнічаць і да каго звярнуцца.