Каманда Кіраўскага раёна ўпершыню заваявала агульнае першае месца па выніках абласной спартакіяды школьнікаў 2019 года.
Начальнік галоўнага ўпраўлення па адукацыі Магілёўскага аблвыканкама Андрэй Заблоцкі ўручае Кубак і Дыплом І ступені за перамогу ў абласной спартакіядзе школьнікаў начальніку аддзела па адукацыі, спорту і турызму райвыканкама Наталлі Траццяковай.
Той факт, што Кіраўшчына з’яўляецца сапраўды спартыўным раёнам, – бясспрэчны і справядлівы. Гэта пастаянна даказваюць нашы прадстаўнікі самых розных узростаў на спартыўных пляцоўках і спаборніцтвах абласнога, рэспубліканскага і нават міжнароднага ўзроўняў. І вось чарговы трыумф кіраўчан – на гэты раз юных спартсменаў і іх трэнераў. Каманда Кіраўскага раёна ўпершыню ў сваёй гісторыі заваявала першае месца па выніках абласной спартакіяды школьнікаў – галоўных абласных вучнёўскіх спаборніцтвах! Заслужаныя ўзнагароды галоўнага ўпраўлення па адукацыі Магілёўскага аблвыканкама, ДУ “Магілёўскі абласны цэнтр фізічнага выхавання і спорту навучэнцаў і студэнтаў” – Дыплом і кубак – на нядаўняй урачыстай нарадзе па падвядзенні вынікаў выступленняў каманд на Рэспубліканскай спартакіядзе школьнікаў і падвядзенні вынікаў абласных круглагадовых спартакіяд сярод устаноў адукацыі, якое праходзіла ў Магілёве, былі ўручаны начальніку аддзела па адукацыі, спорту і турызму райвыканкама Наталлі Траццяковай.
Перамога кіраўчан сапраўды заслужаная і здабыта ў жорсткай канкурэнтнай барацьбе з камандамі яшчэ 20 раёнаў Магілёўшчыны. Да яе мэтанакіравана ішлі не адзін сезон, год за годам прыбаўляючы ў якасці выступленняў. Істотную ролю ў гэтым, адыграла тое, што на высокім арганізацыйным узроўні пастаянна наладжана правядзенне раённых спаборніцтваў практычна ва ўсіх відах. І па іх выніках на абласны ўзровень адбіраюцца самыя дастойныя. А яны, у сваю чаргу, дастойна прадстаўляюць потым і раён.
Самае значнае прадстаўніцтва ў саставах зборных каманд раёна ў розных відах абласной спартакіяды належыла вучням Паўлавіцкай СШ імя Р.А.Худалеева (трэнер Валерый Вароніч).
Да адносна нядаўняга часу кіраўчанам не ўдавалася “зачапіцца” за прызавыя месцы. Але, нарэшце, сезоны 2017 і 2018 гадоў сталі для нас “бронзавымі”. Прычым адставанне ад лідараў можна было назваць мізэрным. І вось усе астатнія каманды пакінуты за спіной.
Агульная перамога склалася з розных паказчыкаў, якія выліліся ў лепшую суму балаў. У залік увайшлі выступленні ў 10 абавязковых відах: шашках, шахматах, лыжных гонках, плаванні, настольным тэнісе, футболе, лёгкай атлетыцы, “Снежным снайперы”, мнагаборствах “Здароўе” і “Абаронца Айчыны” (зімовым і летнім кожнае). У іх прадстаўнікі нашага раёна набралі 368 ачкоў (другі паказчык). Багаж ачкоў (+73) папоўніла таксама выступленне ў відах па выбары, дзе былі паказаны высокія рэзультаты, у нашым выпадку імі аказаліся веласпорт і цяжкая атлетыка. Узмацнілі перавагу юныя спартсмены, якія былі ўключаны ў зборныя вобласці для ўдзелу ў рэспубліканскіх спаборніцтвах (+13) і ў рэспубліканскай спартакіядзе школьнікаў (+38). Як правіла, сюды ўвайшлі прызёры абласнога этапу. Кіраўчане прадстаўлялі Прыдняпроўскі край у веласпорце, шашках, лёгкай атлетыцы і валейболе. Яны, дарэчы, дапамаглі зборнай Магілёўшчыны заваяваць сёлета ў рэспубліканскай спартакіядзе школьнікаў ганаровае 3е месца. У агульным заліку наша каманда набрала 492 ачкі і з вялікім адрывам апярэдзіла сёлетніх сярэбраных прызёраў – зборную Хоцімскага раёна (462 ачкі). “Бронза” дасталася камандзе Асіповіцкага раёна (439 ачкоў).
Варта адзначыць, што перамога кавалася агульнымі намаганнямі вучняў і іх педагогаў. Як заўсёды, самае значнае прадстаўніцтва ў саставах зборных каманд раёна ў розных відах належыла спартсменам Паўлавіцкай СШ імя Р.А.Худалеева (трэнер Валерый Вароніч). Рабяты з гэтай установы адукацыі дастойна выступалі і на рэспубліканскіх спаборніцтвах. Нездарма красамоўны той факт, што менавіта Паўлавіцкая школа ў чарговы раз (11ты запар) стала пераможцай раённай спартакіяды школьнікаў. Выдатна праявілі сябе выхаванцы СДЮШАР: аддзяленняў веласпорту (трэнеры Юрый Цішкоў, Павел Белахвостаў), цяжкай атлетыкі (трэнеры Кірыл Іваніцкі, Юрый Асташоў), валейболу (трэнер Сяргей Лазаковіч). Гонар Кіраўшчыны дастойна адстойвалі рабяты з СШ №1 (трэнеры Барыс Гаўрыленка, Аляксандр Каранкевіч), Мышкавіцкай СШ (трэнер Аляксандр Якавец), Чыгірынскай СШ (трэнер Сяргей Іваніцкі), СШ №2 імя К.П.Арлоўскага (трэнер Сяргей Садоўнікаў), Барчыцкага НПК ДССШ (трэнер Алена Яскевіч), Жыліцкага НПК ДССШ (трэнер Уладзімір Лугін).
Хацелася б пажадаць нашым юным спартсменам і надалей упэўнена трымаць высока ўзнятую планку. Здабытая перамога асабліва важная, бо менавіта ў школьным узросце закладваюцца асновы здаровага ладу жыцця і спартыўнага даўгалецця.
Аляксандр ХАХЛОЎ.