Таямнічая "жыхарка Каплічаў" ужо другі раз замініравала школу пад Калінкавічамі

Раніцай 2 верасня была замініравана школа ў Шыічах у Калінкавіцкім раёне. Паведамленне пра бомбу паступіла ратавальнікам па электроннай пошце ад імя "жыхаркі Каплічаў". Нешта падобнае ўжо адбылося 23 лютага, калі мініравалася школа ў Каплічах. "Жыхарку Каплічаў" тады не знайшлі. Цяпер пошукі актывізуюцца. Гаворка ідзе пра злоснае хуліганства, інфармуюць "Калінкавіцкія навіны".

Сапёры праверылі будынак школы і навакольную тэрыторыю і нічога небяспечнага не знайшлі. Што да ўрачыстай лінейкі школьнікаў, то яна адбылася каля сельскага выканкама. Частка дзяцей займалася ў будынку выканкама, іншыя — у клубе і дзіцячым садку.