25-гадовы настаўнік гісторыі з Вілейкі скончыў жыццё самагубствам
Арцём Харашэй / nn.by
У Вілейскім раёне загінуў 25-гадовы настаўнік гісторыі Арцём Харашэй, піша "Наша Ніва".
Хлопец знік 23 жніўня. Паведамлялася, быццам зранку ён паехаў у грыбы ў лес каля возера Свір і перастаў выходзіць на сувязь.
Яго шукалі міліцыя, ратавальнікі, мясцовыя жыхары і валанцёры. 25 жніўня ў лесе недалёка ад вёскі Няверавічы (Мядзельскі раён) знайшлі аўтамабіль Харашэя, а потым і яго самога.
У каментары парталу mlyn.by афіцыйны прадстаўнік упраўлення ўнутраных спраў Мінаблвыканкама Сяргей Басько распавёў, што паводле папярэдняй версіі, Харашэй скончыў жыццё самагубствам. Праверкай інцыдэнту займаецца Следчы камітэт.
Харашэй працаваў выкладчыкам гісторыі у Вілейскім каледжы. Яго калегі адгукаюцца пра хлопца добра: "Разумны хлопец. Скончыў магістратуру, вучыўся ў аспірантуры БДУ. Для нас гэта шок, ніхто не чакаў такога. Прыкмет, што штосьці не ў парадку, аніякіх не было. Праблем з працай таксама. Арцём быў на добрым рахунку, вельмі разумны хлопец, вельмі добры спецыяліст".
Пахавалі Арцёма Харашэя 27 жніўня.