У Магілёве жанчына скрала ў слесара, які спаў на вуліцы, пісталет
Ілюстрацыйнае фота / pixabay.com
У Магілёве жанчына скрала ў 25-гадовага слесара, які спаў на вуліцы, пнеўматычны пісталет. Як інфармуе сайт mogilevnews.by, таксама яна забрала боепрыпасы і дакументы на пісталет (агулам на 430 рублёў).
Шукаць зламысніцу пачалі пасля таго, як у міліцыю паступіла заява ад жыхара Магілёва. Паводле яго слоў, каля 4-й гадзіны раніцы ён вяртаўся дахаты ў стане алкагольнага ап'янення, але сілаў не хапіла — заснуў проста на асфальце. Міма праязджаў раварыст, які спрабаваў пабудзіць мужчыну, але няўдала. Пасля прыйшла 62-гадовая жанчына. Яна не стала будзіць слесара, праверыла яго кішэні і чамусьці вырашыла забраць з сумкі пісталет, пасля чаго сышла. Яе знайшлі, скрадзеныя рэчы знойдзены. Вядома, што раней жанчына не мела праблемаў з законам. Крымінальную справу яшчэ не распачыналі.