Да дня вызвалення Беларусі ад нямецка-фашысцкіх захопнікаў у пераможным 45-м наша “раёнка” выйшла іменна 3 ліпеня.
Адкрываецца яна перадавым артыкулам “3 ліпеня — усенароднае беларускае свята”. (Адразу дадам, што значнасць і важнасць гэтага дня яшчэ больш узмацнелі пасля рэферэндуму 1996 года, калі наш народ вызначыў яго як Дзень Незалежнасці Рэспублікі Беларусь).
У артыкуле гаворыцца, што ў рэспубліцы вялі значную работу па аднаўленні народнай гаспадаркі, разбуранай у Вялікую Айчынную вайну. Ставілася задача намаганні павялічыць, каб не толькі аднавіць узровень жыцця даваеннага часу, але зрабіць яго больш заможным і культурным.
У асобных заметках “Чырвоны сцяг” расказвае, што ў раёне зроблена за год аднаўленчай працы пасля вызвалення зямель ад фашысцкіх акупантаў. Так, многа давялося папрацаваць работнікам райпрамкамбіната: пусцілі лесазавод, адрамантавалі цагельны завод, абсталявалі майстэрні. Адноўлены выпуск цэглы, мыла, колавай мазі, лесаматэрыялаў, запрацавалі кузня і сталярная майстэрня.
Захопнікам не ўдалося зруйнаваць спіртзавод “Альба”, хоць абсталяванне было падрыхтавана да вывазу. Гэтаму перашкодзіла хуткае наступленне Чырвонай Арміі. І адразу пасля вызвалення раёна завод пачаў працаваць і выпускаць прадукцыю. У 1944 годзе вытворчы план на прадпрыемстве выканалі на 147,3 %, даўшы 25 тысяч рублёў прыбытку. Дзякуючы тэхнічнаму ўдасканаленню, план першага квартала 1945 года быў выкананы на 187 %, прыбытак склаў 175411 рублёў. Сярод лепшых рабочых завода называліся Антон Качура, Алена Кіпець, Зоя Волчак, Сцепаніда Драчан. Пра гэта расказаў у газеце дырэктар прадпрыемства т. Сляпцоў.
Дастойна сустракалі першую гадавіну вызвалення Беларусі і сяляне. Напрыклад, у Квачоўскім сельсавеце, своечасова закончыўшы веснавую сяўбу, пачалі рыхтавацца да ўборкі ўраджаю. Завершана праполка ўсіх культур, у разгары — сенакос. Першае сена сяляне рыхтавалі для здачы дзяржаве.
“Чырвоны сцяг” чытала
Тамара ПРАЛЬ-ГУЛЬ.